Теміржолшылар екі тәулікте 36 мың текше метрден астам қар шығарды

Өткен екі тәулікте темір жолдардан 36 мың текше метрден астам қар жинап алынды. Қар тазалайтын машиналар 105 рейс жасады, деп хабарлайды Rail-news.kz.  

Теміржол төсемін жедел тазалау үшін 88 қар тазалау техникасының шығуы жүзеге асырылып, олардың көмегімен 25 мың шақырымнан астам жол тазартылды.

Бағыттамалық бұрмаларды тазалауға, біліктерді қардан аршуға 3 658 жол монтері жұмылдырылған. Тәулік бойы жедел қызметтердің кезекшілігі жүргізілді. Жолдың жай-күйі, байланыс желісі және техника күшейтілген бақылауда болды.  

Қар мен боран жағдайында қабылданған шаралар теміржол көлігінің үздіксіз жұмысын қамтамасыз етті.