Темір жолда су тасқынына қарсы іс-шаралар жүргізілуде
Көктем жақындағанда Қостанай өңірінде су тасқыны кезеңіне теміржол инфрақұрылымын дайындау жұмыстары белсенді жүргізілуде. Өңірдің барлық жол дистанциясының мамандары су өткізу құбырларын тазалауды және қарғын суларды бұру үшін арналарды дайындауды қамтамасыз етеді, деп хабарлайды Rail-news.kz.
Жолдарды, көпірлерді және басқа да объектілерді тексеруді қоса алғанда, инфрақұрылымның жай-күйіне тұрақты мониторинг жүргізіледі. Қауіпті учаскелерді күнделікті айналып өту ұйымдастырылды. Жол дистанциясы қызметкерлері бөгеттер мен су қоймаларын тексеріп, туындайтын қауіп-қатерлерге жедел ден қоюды қамтамасыз етеді. Ревизорлық аппарат пойыздар қозғалысы қауіпсіздігіне тәулік бойы мониторинг жүргізеді, бұл кез келген жағдайға жедел ден қоюға мүмкіндік береді. Жолаушылар мен қызметкерлерді хабардар ету жүйесі тексеріледі.
Қостанай учаскесі бойынша ҚТЖ қозғалыс қауіпсіздігі департаментінің өңірлік бас ревизоры Әлібек Махамбет атап өткендей, су тасқынына қарсы іс-шаралар пойыздар қозғалысы қауіпсіздігін қамтамасыз ету және теміржол тасымалының сенімділігін қолдау үшін маңызды болып табылады.
Сонымен қатар, өткен жылдың жазғы кезеңінде жолдар бойындағы қорғаныш бөгеттер мен үйінділерді салу және жөндеу, сондай-ақ еріген суды жолдар мен станциялардан бұру үшін дренаждық жүйелерді жаңарту бойынша жұмыстар жүргізілді. Жыл сайын нөсерлік кәріздер мен дренажды арықтар жөнделеді. Сондай-ақ су тасқыны болған жағдайда эвакуациялау жоспарлары әзірленуде және қызметкерлер үшін су тасқынына қарсы жаттығулар өткізілуде.
"Климаттың өзгеруі мен ықтимал қауіптерді ескеретін ұзақ мерзімді стратегиялар әзірленді. Барлық іс — шаралар тәуекелдерді басқарудың бірыңғай жүйесіне біріктірілген және оларды іске асыру мемлекеттік органдармен, экологиялық ұйымдармен және жергілікті қоғамдастықтармен тығыз өзара іс-қимылды талап етеді", - деп атап өтті Әлібек Махамбет.