Жаз қызығы жалғасуда…

Жаңалықтар

15.08.2017, 12:16

Үш ай каникулда теміржолшылардың мектеп жасындағы ұл-қыздары үшін жаз қызығы жалғасуда. Биылғы жылы барлық аймақтан балалардың Астанаға арнайы сапары ұйымдастырылып, жас жеткіншектердің ЕХРО-2017 көрмесін тамашалауына мүмкіндік жасалды. Қызылорда Өткен апта Сыр елінен Елордаға аттанған топ қарасы мол болды. Қадр және кәсіподақ қызметкерлері бастаған теміржолшылардың 32 баласы жолға шықты. Жол бойы балалардың денсаулығын бақылайтын бір медбике бар. Сонымен қатар дәл осы №56 «Қызылорда-Көкшетау» пойызымен Социалистік Еңбек Ері Оразбай Әбішев бастаған аймақ ардагерлері де Экспо көрмесін тамашалауға жолға шығыпты. Астанаға жол тартқан сырбойылықтарды шығарып салуға қала әкімі орынбасары Шахмардан Байманов пен аймақтық ардагерлер кеңесі төрағасы Сейілбек Шаухаманов бастаған ақсақалдар, әнші-күйші, көпшілік қауым жиылып, жолаушыларға сәттілік тілеп думандатып шығарып салды. -Жаңақорған мен Сексеуіл станциялары арасындағы теміржолшылардың балаларын Астана қаласын және ЕХРО-2017 көрмесін тамашалауға алып бара жатырмыз. Екі күн Экспоны аралаймыз, балалар үшін барлық жағдай жасалған, тамағы, суы, барған кездегі жатын жайы бәрі реттеліп қойылған,- дейді балалардың жетекшісі әрі жол басшысы, кәсіподақ өкілі Мұхтар Өмірзақұлы.

Сабырхан СЕЙІЛБЕКҰЛЫ, Қызылорда

Шымкент

Биылғы жылы Оңтүстік Қазақстан облысында теміржолшылардың 230 ден астам баласы жазғы сауықтыру лагерінде дамалып, Елордаға саяхат жасады. Әсіресе, «ЭКСПО- 2017» халықаралық көрмесіне барып қайтқан балалардың саяхатты ұйымдастырған теміржолшы ағаларына, кәсіподақ комитетіне алғыстары шексіз болды. Елордаға екі күндік саяхатқа барған 32 бала негізінен көп балалы, аз қамтылған отбасының балалары, және оқуда, спортта жетістікке жеткен оқушылар екен. Алғашқы күні халықаралық көрмедегі қазақстандық «Нұр әлем» павилонын, келесі күні және шетелдік павилондарды аралаған балалар Астанадағы мұражайлар мен «Думан» ойын сауық орталығын және саябақтарға да экскурссия жасауға уақыт таба біліпті. Аймақтық кәсіподақ комитетінің төрағасы Хайрулла Сәрсенов «Қазақстан темір жолы» Жүк тасымалы» АҚ кәсіподақ комитетінің төрағасы Ермек Төлегенов Астана қаласына саяхаттап барған балалармен кездесіп, олармен болашақта мамандық таңдау және білім алу жайында әңгіме-сұқбат құрып, балаға естелік альбом сыйға тартқанын жеткізді. Бұдан бөлек, 7-13 жас аралығындағы 98 оқушы Алматының Талғарында орналасқан «Спутник» лагеріне демалуға аттаныпты. Шымкент, Сарыағаш, Арыс пен Түркістан сынды станциялардан жиналған балаларды Шымкент темір жол вокзалынан кәсіподақ өкілдерімен қатар ата-аналары да шығарып салды.

Жаз қызығы жалғасуда…

Басқа да жаңалықтар

Қазақстан теміржолшысы газеті, №32-33 28 сәуір 2026 жыл