Теміржолшылар ауылындағы той
«Қазақстан теміржолшысы» газетінің тілшісі
Ұлыс мерекесін ҚТЖ қызметкерлері әдеттегідей «Нұрлы жол» вокзалы аумағында дүркіретіп атап өтті. Теміржолшылардың этноауылында 6-7 киіз үй тігіліп, компания қызметкерлерінің өз күшімен ұлттық өнеріміз бен дәстүрді дәріптеген концерттік бағдарлама ұйымдастырылды.
Келген қонақтар әр киіз үйге бас сұғып, ұлттық тағамдардан, наурыз көже, бауырсақ және палаудан ауыз тиді және салт-дәстүріміздің сан түріне куә болды.
«ҚТЖ» ҰК» АҚ басқарма төрағасы Нұрлан Сауранбаев бастаған компанияның басшылық құрамы құрылымдық бөлімшелер мен еншілес ұйымдар тіккен алты қанат ақ үйлерге кіріп, ақтан ауыз тиді, өнерпаздардың концерттік бағдарламасын тамашалады. Сондай-ақ наурызнама онкүндігіне ерекше атсалысқан ұжымдарды марапаттады.
Жалпы биылғы Наурыз Қазақстан Халқы Ассамблеясының 30 жылдығына арналды. Сондықтан әр мекеме түркі халықтарының мәдениетін, яғни ұлттық ән-биін көрсетіп, тағамдарын ұсынды. Атап айтқанда, олар қазақ, әзірбайжан, татар, түрік, түрікмен, өзбек халықтарының ерекшелігін паш ететін өнерін көрсетті. Әр киіз үйде қазақ қолөнершілері мен мүсіншілері, зергерлерінің туындылары қойылған көрме ұйымдастырылды.
Этноауылдағы киіз үйлердің бірінде өткен думанда компания басшысы тұсаукесер рәсіміне қатысып, 3 теміржолшының баласының тұсауын кесті. Магистральдық желі дирекциясы тіккен ақбоз үй Қазақ ауылы ретінде көш бастады. Түрікмен ұлтының өнерін көрсеткен «Кедентранссервис» АҚ киіз үйінде суретшілер, зергершілер мен мүсіншілер еңбектері қойылып, қазақтың белгілі тұлғаларының қола, мыс және балшықтан істелген мүсіндері ұсынылды. Дастархан жайылып, келушілерге ұлттық тағамдар берілді. Татар халқының мәдени ерекшелігін көрсеткен «Қазтеміртранс» АҚ үйінде киізден жасалған бұйымдардың көрмесі өтті.
– Біздің мекеме киіз үй ішінде көрпенің, құрақтың жасалу жолын көрсеттік. Қолөнерге бейімі бар қызметкерлеріміз ұлттық ою-өрнектің мәнін, қайда қолданылатынын айтты. Сосын киіз үй алдында түріктің биін билеп, ұлттық тағамдарын ұсындық. Биылғы Наурыз ҚТЖ-да өте ерекше және жоғары деңгейде өтті, ұлттық мерекеміздің осылай жылдан-жылға жаңғыра түскені қуантады, – дейді «KTZ Express» АҚ ұйымдастыру және бақылау қызметінің жетекшісі Айжамал Қуаныш.
Әзірбайжан халқының өнерін «Жолаушылар тасымалы» АҚ көрсетсе, «ҚТЖ Жүк тасымалы» ЖШС қызметкерлері өзбек халқының мәдениетін паш етіп, ұлттық киімдерімен өнер көрсетті.
Этноауылдағы әр киіз үйдің алдында асық ату, арқан тартыс, гір көтеру, қой көтеру сынды ойындар ойнатылды. Киіз үйлердің бәрі ұлттық нақышта безендіріліп, әр үйдің алдында ұлттық киім киген, қолына қыран бүркіт, қасына құмай тазы ерткен қыз бен жігіттер келген қонақтарды қарсы алып тұрды. Негізгі сахнада компанияның өзінің өнерпаз қызметкерлері келушілерге ән мен биден шашу шашты.
