Жаңашыл ұсыныс – жастардан

Жаңалықтар

22.08.2017, 10:20

Оқуға 2 мин

Темір жол – шуақты Шу өңірінің тамыр бүлкілі десек қателеспейміз. Нағыз тоғыз жолдың торабында жатқан Шу станциясы арқылы оңтүстіктен солтүстікке, батыстан шығысқа ерсілі-қарсылы ағылған пойыздар легі күндіз-түні толастаған емес. Күн сайын миллиондаған тонна жүк пен мыңдаған жолаушының қауіпсіздігін қамтамасыз етіп отырған шулық теміржолшылар арасында шойынжол кәсібін атадан балаға мирас еткен дәстүр қалыптасқалы да бір ғасырға жуық уақыт өтіпті. Қазіргі таңда Шу ауданында 640 жас темір жол саласында қызмет етеді. Солардың дені ата дәстүрін жалғастырған теміржолшылар әулетінің өкілдері. Олар теміржолдың ерлікке толы тарихын жасаған аталар даңқына адал. Мәселен, Шу электрмен жабдықтау дистанциясында бір топ жас шоғыр еңбек етеді. Дистанцияның «жүрегі» өндірістік-техникалық бөлімін құрайтын бұл жоғары білімді, еңбек жолын қатардағы монтер болып бастап, тәжірибе жинақтап, сатылай өсіп келе жатқан жастар өндірісті алға бастыруда жаңашыл көзқарастарымен, тиімді ұсыныстарымен көзге түсіп жүр. –Темір жол желісін үздіксіз электр жүйесімен қамтамасыз етуде бір минут та үзіліс болмайды. Оған қоса, темір жол бойында бізден электр қуатын алатын тұтынушыларымыз бар. Дистанцияға қарасты 7 түйіспелі торап учаскесі мен 5 қосалқы тартым станциясы бар. №3 Шу қосалқы тартым станциясы жақында ғана қайта жаңғыртудан өтті. Темір жол желісіне қажетті электр қуатын бөлетін станция толығымен немістің «Siemens» компаниясының құрылғыларымен жабдықталған. Заманауи технологияны игеруде біз жастар көшбасшы болуға тиіспіз, сондықтан да біз оқу мен ізденуден ешқашан жалықпайтын боламыз, – дейді жаңашыл жастардың бірі, бөлім инженері Бауыржан Мұсақұл. Елдар Ыбырайқұл 2015 жылы М.Тынышпаев атындағы Қазақ көлік және коммуникациялар академиясын тәмамдап, еңбек жолын осы дистанциядан бастаған жас маман. –Теміржолдың бойындағы қызу тіршіліктің бойына қан жүгіртіп отыратын электрмен жабдықтау саласының қауіп-қатері басым. Статистиканы қараңыз, жыл сайын тоқ көзінің қаупін елемей, абайсызда ажал құшып жатқандар қаншама... Сондықтан, техника қауіпсіздігін сақтау – біздің ең бірінші талабымыз және ұстанымымыз,– дейді жас маман Елдар.

Жаңашыл ұсыныс – жастардан

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл