ҚТЖ «HR-бренд 2025» байқауында жүлделі орынға ие болды

«Самұрық Қазына» АҚ компаниялар топтары арасында өткен «HR бренд-2025» корпоративтік байқауының марапаттау жиыны салтанатты түрде аталып өтті. Байқау нәтижесінде «ҚТЖ» ҰК» АҚ «Іріктеу шебері» аталымы бойынша марапатталды.  

Байқау мақсаты - үздік HR-тәжірибелерді анықтау және тарату. Оған бес номинация бойынша 25 кейс: кадрларды іріктеу, таланттарды дамыту, цифрландыру, қызметкерлерді тарту және басқарудың инновациялық әдістерін ұсынған 9 компания қатысты. Жиынды сөз сөйлеп ашқан «Самұрық Қазына» АҚ Басқарма төрағасы Нұрлан Жақыпов бұл нәтижелер – жай кезекті байқаудағы жеңіс қана емес, бұл қордың портфельді компаниялардың бизнестегі іргетасын құрайтын мықты HR компаниялардың еңбегіне берілген әділ баға екенін атап өтті.  

-Қор компаниялардың технологиялары мен процестердің дамуына көп көңіл бөледі. Осы ретте HR қызмет те көштен қалмауда. HR саласындағы байқау қор тарихында алғаш рет өткізілді. Бұл бастамасы ғана. Енді ол дәстүрлі жалғасын тауып отырады. Биыл ұсынылған кейстердің әрқайсысы  ерекше. Бастысы оларды HR саласында қолдануға болады. Мемлекет басшысы 2025 жылды Жұмысшы мамандықтар жылы деп жариялады. Бұл жұмысшы мамандықтардың беделін арттыруға бағытталған. Сондай-ақ кәсіптік техникалық білім беру жүйесі де реформалануда. Адал еңбек қашан да бағалануы керек. Қызметкерлерді әлеуметтік қорғау – біз үшін басым бағыт. Бұл ретте көптеген жұмыстар атқарылуда, - деп басқарма төрағасы Қор көлемінде осы бағытта атқарылып жатқан жұмыстарды баяндап шықты.  

Одан әрі аталған байқау жеңімпаздарын марапаттауға көшті. Алдымен «Іріктеу шебері» аталымы бойынша «ҚТЖ» ҰК» АҚ басқарма төрағасы Талғат Алдыбергеновті ортаға шақырып, марапатын ұсынды. Одан әрі өзге де қор құрамындағы 4 компанияға аталым бойынша марапаттарын тапсырды. Атап айтқанда, «Самұрық -Энерго» АҚ «Таланттар сәулетшісі», «Қазатомөнеркәсіп» ҰАК «HR серпілісі», «Қазпошта» АҚ «Белсенділік драйвері», KЕGOС компаниясы «Цифрлық HR жетекшісі» аталымдарымен марапатталды. Сонымен қатар байқауға қатысқаны үшін бірқатар компаниялар Алғыс хаттарға ие болды.  

Іс-шараның екінші бөлігі «HR Talks» сессиямен жалғасты. Сессия тақырыбы  - «Еңбек қатынастарының реформалары» туралы болды.