Жаңа технология жерсінбей жатыр

Жаңалықтар

19.09.2017, 11:12

Оқуға 2 мин

Шымкент – Түлкібас телімінде 8 станция орналасқан. Осы аралықтағы СОБ бойынша телім бастығы Мәлік Бақтиярұлы әр бекетке тоқсанына бір келіп, екі механик пен үш монтердің жұмысын қадағалайды. Жиырма жылға кепілдігі бар итальяндық Альстом электр жетегін күтіп-баптауға байланысшылар да үйренген. Тек, оның кері тұстары да жоқ емес. Бұл құрылғы қазір Алматыда құрастырылуда. – Апта сайын тексеру кезінде Альстомның сыртын тазалап, сымдарын түзегеніміз болмаса, ішін ашуға рұқсат жоқ. Ашқанда оның қосалқы бөлшектері қат болуда. Сондықтан, қауіпті жағдайда істен шықса Алматыдағы зауытқа жібереміз. Немесе арасында қолдан жөндеуге келетіндерін қарастырамыз. Альстом Алматыға «кеткенде» 4 сағаттық толаскез алып, орнына бұрынғы СП-6 электр жетегін қосамыз. Электр жетегі ауысқаннан пойыз кестесіне зиян келмеу керек. Шыныны айтсақ, жаңа технология жерсінбей жатыр. Құрылғының жиі сыр беруінің себебі көп. Мүмкін біздің елдің ауа-райына сай емес шығар. Оның үстіне Итальяда шпалдарға қимылдамайтындай етіп, бетон-моналит құйып орнатады. Бізде жүк пойыздары жиі өткен сайын бетон мейлі бөрене шпал болсын қатырған жерінен айнып, жылжып тұрады. Осының өзі аталған құрылғыға кері әсер етсе керек. 2013 жылдан бері 146 дана Альстом орнатылған. Бұл жетек типіне қарай Р-65 рельстеріне қойылады. Альстом – жаңа технология болғанымен, бұрынғы ресейлік СП-6 электр жетектері де бұдан кем емес. Бағасы да тиімді. Бұзылып қалса қосалқы бөлшектері де оңай табылады. Әрі ішін ашып, өзіміз ауыстыра береміз,- дейді Мәлік Бейсенов.

Жаңа технология жерсінбей жатыр

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл