Жездінің жарқын ертеңі

Жаңалықтар

19.09.2017, 11:24

Қаныштай ғалымның көзіндей болған кенді өлкенің тоқырау жылдарында дамуы тұйықталып қалғанымен, теміржолмен екінші тынысы ашылғалы мұнда оң өзгерістердің орын алып жатқаны қуантады. Оған Жездіге барған сапарымызда куә болдық. Жезқазғанның темір жолын күтіп-баптап отырған Жаңарқа жол дистанциясы директорының орынбасары Сәбит Ахметбаевтың айтуынша, станцияның 6 жолы мен 33 бағыттама бұрмасы толығымен жаңартылып, Р50 рельсі Р65-ке ауыстырылған. Бұл жан-жақты бағыттары көбейген станция жолдарының жарамдылық деңгейін жақсартып, қауіпсіз қозғалысты қамтамасыз етуге ықпал еткені рас. Жалпы 9 айналымы бар дистанцияның №19 айналымындағы 4 бригадир мен 7 жолшы Жезқазған станциясының жолын қысы-жазы күтімде ұстап отыр. Механикалық шеберханада 2 КАМАЗ, 1 УАЗ және 2 қар тазалайтын техника бар. –Айналымның станция бойынша қызмет көрсету аумағы 396 км басталып, 421 км дейінгі аралықты қамтиды. Дистанция бойынша қазіргі таңда Қызылжар – Түйемойнақ телімінде «Жол жөндеуші» ЖШС-нің мердігерлік етуімен күрделі жөндеу жүргізілуде, – дейді С. Ахметбаев. Ал Жаңарқа белгі беру және байланыс дистанциясы директорының СОБ бойынша орынбасары Ғалым Балтабаев Жезқазған – Бейнеу жаңа жолы ашылғалы дистанцияның мұндағы цехтары көбейгенін айтады. Бүгінде мұнда байланыстың 6 түрі бойынша цехтар жұмыс істеп, онда 50 адам еңбек етуде екен. –Жезқазған мен Қоскөл арасында 8 бекет пен 4 станция іске қосылды. Бұрын байланыс үйі болған ғимаратты жөндеп, қасынан вахталық әдіспен жұмыс істейтін теміржолшылар үшін жатақхана жасадық. Ал тек теміржол қосындары орналасқан бекеттерде байланысшылар үшін демалыс орын қарастырылған. Ол жаққа 15 күннен вахталық әдіспен жұмысқа барып келеді. Жалпы қызмет көрсету аумағымыз бұрынғыдан 80 пайызға көбейді, – дейді Ғ. Балтабаев. Бүгінде станцияда қайта құру жұмыстары жүргізіліп жатқандықтан бағыттама бұрмалар уақытша қолмен басқарылуда екен. Станция кезекшісі тек рация арқылы байланысқа шыға отырып, бір-бірін бақылау жасап отырады. Теміржолшыларға қиындық келтіріп жатқан бұл кемшілік биыл жыл соңына дейін шешілмек. Жаңадан бой көтерген ЭО қосыны іске қосылса, барлық жұмыс компьютермен басқарылатын болады. Қызметкерлердің 80 пайызы жастар, арнайы білім алған оларды мекеме өздері үйретіп, қосымша жетілдіру курстарына жіберуде екен. Жезқазғанның басынан жаңа электрмен жабдықтау дистанциясының ашылғанына бір жылдай болыпты. Дистанция директорының орынбасары Мәди Түсіпбаев станцияда бұрын тек электрмен жабдықтау ауданы ғана болғанын айтады. Жаңа дистанцияда қызмет ететін 164 адам 1200 км аумақтың электрмен жабдықталуына жауапты. Мекемеге қарасты 8 подстанса мен 5 РЭС бар бүгінде толыққанды жұмыс істеп тұр. «Вокзал сервис» қоғамынан Қарағанды магистральдық желі дирекциясы қарамағына өткен Жезқазған вокзалының бастығы Ләззат Алтаева жаңа жол ашылғалы бергі ғаламат жаңалықтар бұл станцияда бұрын-соңды болмағанын жеткізді. Бүгінде вокзалда 4 касса жұмыс істесе, содан күніне 600-700 адам билет алады екен. Ал бұрын ол бар болғаны 200-300 болған. –Екі вокзал кезекшісі, анықтама беретін екі кезекші-диктор, басқа да қызметкерлерімізді қосқанда барлығы 8 адам жұмыс істейміз. Штатымыз жаңа пойыздардың ашылуына орай артады деп жоспарлануда, – дейді вокзал бастығы. Жездінің халқы жаңа жол ашылып, пойыз көбейгеніне қуанышты. Жезқазғанда тіршілік қайта жанданып, жұмыс та көбейген. –Бүгінде халық арасында сауалнама жүргізіп жатырмыз. Егер сұраныс болатын болса, күндізгі уақытқа тағы бір Жезқазған – Қарағанды – Астана деген пойыз шығару көзделуде. Қазірде бізден Жезқазған – Балқаш, Жезқазған – Алматы бағытына пойыздар жүреді. Вокзал ішінде электронды кезек, терминал жұмыс істейді. Биыл перрон жөнделді. Өтетін жолдар халыққа ыңғайланып салынуда, – дейді Ләззат Алтаева. Шөлді аймаққа тартылған Жезқазған – Бейнеу теміржолының арқасында осындай орасан жаңалықтар орын алып жатқан өлкедегі ілкімді істердің бірсыпырасы міне, осындай.

Жездінің жарқын ертеңі

Басқа да жаңалықтар

Қазақстан теміржолшысы газеті, №48 23 маусым 2026 жыл