Жазып қойған хатпен тең...

Жаңалықтар

03.10.2017, 17:41

Оқуға 2 мин

Ақ жаулықты апалар мен ақ сақалды аталарын «жазып қойған хатпен тең» деп ардақтаған елдің ұрпағы Халықаралық қарттар күнін де атап өтті. Астана электрмен жабдықтау дистанциясының ұжымы мен «Қазпрофтранс» ҚБ «Астана» филиалы қырыққа жуық ардагер әріптестерін түскі асқа шақырып, мерекемен құттықтады. Онда «Қазақстан темір жолы» ҰК» АҚ ардагерлер кеңесінің төрағасы Болат Дүйсемәлиев болат жол бойында аянбай қызмет еткен зейнеткер теміржолшыларды Қарттар күнімен құттықтап, ізгі тілегін білдірді. Ал «Қазпрофтранс» ҚБ «Астана» филиалының төрағасы Серік Сәрсекеев жиылған қарттарды мерекемен құттықтай отыра, осы шараны ұйымдастырушы электрмен жабдықтау дистанциясы кәсіподақ комитетінің төрағасы Медет Хасеновке алғысын білдіріп, кәсіподақтың 25 жылдық төсбелгісімен марапаттады. Астана пайдалану локомотив депосы мен кәсіподақ комитетінің ұйымдастыруымен Қарттар күні мерекесіне орай өткен мерекелік шарада колледж студенттері өнерлерін көрсетті. Депоның директорының өндіріс жөніндегі орынбасары Дастан Елеусізов қадірлі қарияларды мерекемен құттықтап, «...Сіздер салып кеткен сара жолға шаң жұқтырмай қызмет ету үшін әрдайым ақыл-кеңестеріңізге жүгінеміз. Сондықтан да жол көрсетер шамшырағымыз болып аман-есен жүре беріңіздер», деп жылы лебіз білдірді. Мерекелік дастарханда бас қосқан ардагер теміржолшылар байырғы әріптестерін көріп, арқа-жарқа болып әңгіме-дүкен құрды. Кәсіподақ төрағасы Ринат Абайдилдинов қариялармен демалыс орындарына жолдама беру, ем-дом, материалдық көмек сынды мәселер төңірегінде әңгімелесті. Жандары жадырап, көңілдері шалқыған қариялар атынан сөз алған ардагер теміржолшы Далабай Байғожин: « Бүгінгі отырыс керемет болды. Қарттарға керегі тек көңіл ғой. Осы шараны ұйымдастырушыларға алғыстан басқа айтарым жоқ», – деп ризашылығын білдірді.

Жазып қойған хатпен тең...

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл