Қыстың қамы қатаң бақылауда

Жаңалықтар

10.10.2017, 12:47

Қыс шанасын жаз дайындауға әдеттенген Сыр өңірінің теміржолшылары қазір қатал маусымға дайындық жұмыстарын пысықтап, кем-кетігін түгендеуге кіріскен. Қызылорда ЖТ бөлімшесі директорының темір жол көлігінде қозғалыс қауіпсіздігін қамтамасыз ету жөніндегі бұйрығына сәйкес телімдерде қысқа дайындық шаралары күнделікті жұмыстармен қатар атқарылуда екен. Әсіресе, бүгінгі күннің басты мәселесі, қажетті техникалық және тұрмыстық көмірді жеткізу болып тұр. Бөлімшенің өндірістік бөлім басшысы Байдулла Абылбековтің айтуынша қысқа дайындық жұмыстары шұғыл штаб бақылауымен жүзеге асырылуда екен. –Бөлімше бойынша станция-бекеттердегі техникалық қажеттілікке тиісті 158 тонна көмір, ВЧД бойынша жұмысшылардың жуыну бөлмелері мен ғимаратарды жылытуға керекті 157 тонна техникалық көмір, Шиелі станциясындағы ТД-6 өндірістік жұмыс барысында құм кептіру, жылу қазандықтары секілді қажеттілігіне 233 тонна техкөмір және 4-5-класты станциялардағы теміржолшылардың тұрмыстық қолданысына керекті 483 тонна көмір жақын күндерде жеткізіледі деп күтілуде. Және де 483 тонна тұрмыстық көмірдің қажет болуына байланысты Шұбаркөл көмір разъезімен келісім жасалып, осы айдың екінші жартысында көмір телімдерге жеткізіледі,– дейді өндірістік бөлім басшысы. Сонымен қатар бөлімше нысандарына керекті 552 тонна үрлеп жағылатын техникалық көмір алу үшін «Касперит» серіктестігімен келісім жасалыпты. Аймақ теміржолшыларын, аязға қарсы жақпа май секілді қорғаныш түрлерімен, маусымдық қысқы киіммен қамтамасыз ету, тұтыну мерзімі өткен киімдерді ауыстыру шаралары уақытылы жүргізілуде екен. «Алғаш қыстаушылармен» тамыз айларында өткізілген техникалық сабақтар қайта пысықталып, олар тәжірибелі теміржолшыларға бекітіліп берілген. Қызылорда магистральдық желі бөлімшесіне қарасты сала мекемелерінде де қысқа дайындық жұмыстары күн тәртібінен түскен емес. Бөлімшенің өндірістік-техникалық бөлім бастығының орынбасары Ержан Итемгенов теміржол нысандарын қысқа қажетті көмірмен қамту және қыс маусымына дайындық барысы жайлы айтып өтті. –Магистральдық желі бөлімшесіне қарасты салалық мекемелерде 393 қызметтік және өндірістік ғимараттар болса, солардың барлығы 100 пайыз қысқа дайын. Осы мекемелерді ғимараттарды жылумен қамтамасыз ететін 14 жылу қазандығын дайындау барысында жылу жүйелеріне қысымды тазарту жұмыстары жүргізілді. Жылу беруге қажетті сұйық және қатты отындар жеткізілуде. Ал бөлімше бойынша қыс маусымында қатты отын көмірдің техникалық және тұрмыстық түріне қажеттілік 225 000,20 тонна болса, оларды жеткізуге келісімшарттар жасалған, – дейді Ержан Итемгенов. Сондай-ақ, ол бөлімшеге қарасты теміржол мекемелеріне 205508 тонна қыстық жанармай алуға қатысты келісімнің де жасалғанын атап өтті. Бүгінде телім бойындағы қарға қарсы тұрғызылған қалқандардың 0,400 метріне жөндеу жұмыстары жүргізілген. Темір жолдарды қардан тазартатын 6 СМ-2 арнайы техникалары Сексеуіл, Қазалы жол дистанцияларына бекітіліп, олардың жұмысқа дайындығы тексеруден өткізіліпті. Сексеуіл – Қазалы – Жосалы телімдерінде қарды тазалауға қажеттілік бола қалған жағдайда, абдырап қалмау үшін, дайындық жүргізіліп, техникалардың қар тазалау жұмыстары жоспарланып, Сексеуіл және Қызылорда локомотив пайдалану депосларынан арнайы 6 тепловоз бекітілген. Бөлімше балансындағы 124 түрлі көлемдегі автотехниканың дені қысқы жұмысқа дайындықтан өткен. Және де магистральдық желі бөлімшелеріне жұмысқа орналасқан 31 теміржолшымен арнайы дайындық жұмыстары өткізіліп, олар тәжірибелі мамандарға бекітілген.

Қыстың қамы қатаң бақылауда

Басқа да жаңалықтар

Қазақстан теміржолшысы газеті, №48 23 маусым 2026 жыл