Жас келсе - іске

Жаңалықтар

20.10.2017, 10:57

Оқуға 2 мин

«Қызылорда–ЖТ» бөлімшесінің бір топ жастары аймақ теміржолында еселі еңбек жасап зейнет жасына шыққан ардагерлердің тыныс-тіршілігімен танысып, қолғабыс етті. Бөлімше жастарының басын қосып ардагерлерге көмек беру жұмысын ұйымдастырған «Жас Отан» ЖҚ төрағасы Ернар Зинуллаев белсенді жастарды жиып Қызылорда жол дистанциясынан зейнеткерлікке шыққан Әскербек пен Қыпшагүл Қалдыбаевтардың отбасына тұрмыстық көмек көрсетуге аттанды. Үстеріне сары жилет киіп, қолдарына күрек пен тырма ұстаған жастар қариялардың ауласын тазартып бау-бақшасын баптаса, қыздар үй ішін ретке келтіріп, жуып-шайып, зейнеткерлердің алғысына бөленді. Екеуі де жол дистанциясында, бірі мотовоз жүргізушсі, бірі жолшы болып абыройлы еңбек етіп зейнетке шыққан байырғы теміржолшылар саланың қиын да қызықты шақтарын еске алып, әңгіменің тиегін ағытты. –Біздер жұмыс жасаған уақытта барлық жол күтімі жұмыстары тек қолмен атқарылатын. Жұмыс кезінде жолшылар күнделікті бірнеше шақырым жол жүріп, қос рельстің бабын жасайтын еді. Ол кезде қазіргідей техникалардың қат кезі. Ал қазір естуімше, барлық жұмысты техникаға жүктеп қойыпты деп естимін. Сендердің келгендеріңе қуанып отырмын. Өркендерің өссін, жұмыста нағыз теміржолшыға тән табандылықпен еңбек етіп, алғыр болыңдар, болашақ сендердің қолдарыңда,-деп көмекке келген жастарға ризалық көңілмен батасын берді Әскербек қария. Аймақ теміржолында жалынды жастығын өткізіп бүгінде бейнеттің зейнетіне бөленген ардагерлер қашанда жастардың жұмысына сын көзбен қарап ағат кеткен жерінде қамқорлық танытып, тура жол көрсетуден танған емес.Мұны жақсы ұғынған жастар да қарияларға көмек қолын созуға әрдайым әзір тұрады. –Бүгін Әскербек ата мен Қыпшагүл әжейдің үйіне ауысымнан шыққан жастардың бір бөлігі ғана келді, келесі жолы басқа зейнеткерге барамыз. Қариялардың ақыл-кеңесін тыңдап, батасын алғанның өзі бізге неге тұрады?! Осындай жұмыстар Қызылордада ғана емес бөлімше бойынша барлық станция-бекеттерде жасалып жатыр, - деді «Жас Отан» ЖҚ төрағасы Ернар Зинуллаев.

Жас келсе - іске

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл