Колледж бен жұмыс берушілер бас қосты

Елордадағы М.Тынышпаев атындағы Астана ALT көлік колледжінде «Кәсіпорын мен колледждің өзара іс-қимылының жаңа форматы» тақырыбында дөңгелек үстел өтті.

Іс-шараға теміржол және көлік саласының жетекші кәсіпорындарының өкілдері, әлеуметтік серіктестер, сала ардагерлері мен техникалық және кәсіптік білім беру жүйесінің сарапшылары қатысты.  

Кездесу Жұмысшы мамандықтар жылының қорытындысы аясында ұйымдастырылып, кадрларды практикалық-бағдарлы даярлау мәселелерін талқылайтын маңызды диалог алаңына айналды. Жиынға «ҚТЖ-Жүк тасымалы» ЖШС бас директоры Асан Үмбетов бастаған бір топ теміржолшылар, «Қамқор Локомотив» ЖШС, DAR RAIL, «Жолаушылар тасымалы» АҚ, ҚазАвтоЖол, TALAP және Alstom компанияларының басшылары мен өкілдері келіп, ауқымды күрделі жөндеуден өткен, жаңартылған колледж ішін аралап, білім беру процесімен танысты.  

– Ертеңгі теміржолшылар мен басқа да кәсіптік маман иелерін дайындай отырып, колледж бен жұмыс берушілер арасындағы ынтымақтастықты жаңа деңгейге көтеру, білім беру үдерісін еңбек нарығы талаптарына сәйкестендіру және студенттердің кәсіби құзыреттілігін арттыруға бағытталған тиімді тетіктерді айқындау жолында жұмыс жүргіземіз. Сол себепті оқу орнында мамандарды даярлаудың заманауи моделі қарастырылады. Бұл модель бойынша оқу үдерісі нақты өндірістік жағдайларға барынша жақындатылған: дуалды оқыту жүйесін енгізу, яғни 3 күн теория – колледжде, 2 күн практика кәсіпорында өтеді, сабақтарды нақты өндірістік ортада өткізу, білім беру бағдарламаларын әзірлеуге кәсіпорындардың қатысуы, тәжірибелі мамандарды тәлімгер ретінде бекіту, өндірістік практиканы тікелей жұмыс орындарында ұйымдастыруға басымдық беріледі. Осы ретте бізге тәжірибе алаңы және түлектерімізге жұмыс беруші ретінде қолдау көрсетіп келе жатқан ҚТЖ компаниясына алғыс білдіреміз, – деді колледж директоры Әлішер Жұмаділдин.  

Іс-шара аясында «Еңбекті қорғау» кабинеті салтанатты түрде ашылып, ол көрнекті теміржолшы Қазезхан Жұматаев есімімен аталатын болды.  

– Болашақ теміржолшыларды даярлайтын бұл оқу орнымен тығыз қарым-қатынас орнатып, оқу бағдарламасына, тәжірибелік жұмыстарға қолдау білдіру мақсатында бірлескен іс-шараларымызды тереңдете түсуге ниеттіміз. Оқу орнында студенттерге қолайлы жағдай жасалып, оларды білімге ынталандыратын ахуал қалыптасқаны жөн, – деді Асан Үмбетов.  

Оқу корпусының 3-4 қабаттарында «Теміржол көлігін пайдалану және техникалық қызмет көрсету» тақырыбында шеберлік сабағы ұйымдастырылып, қонақтар колледждің материалдық-техникалық базасымен және студенттердің практикалық даярлығымен танысты. Кездесу қорытындысы бойынша әлеуметтік серіктестермен ынтымақтастық туралы меморандумға қол қойылды.