Бітпейтін дау – сол баяғы төрт түлік...

Жаңалықтар

24.10.2017, 11:21

Оқуға 3 мин

Жыл басынан қазан айының 7-не дейін Маңғыстау жол дистанциясына қарасты темір жол бойында тепловоз машинистері өткен он айда 46 рет жедел тежеу жасауға мәжбүр болған... Себеп, әрине біреу – бағусыз ауа жайылған малдың жолға шығып кетуі. «Айта –айта Алтайды, Жамал апам қартайды» демекші, жазыла-жазыла жауыр болған тақырып күн тәртібінен әлі күнге түспей отырғаны, мәселенің шешімін таппай отырғанымен байланысты болса керек. Мал-жанды басудың алдың алу барлық уақытта мүмкін бола бермейтіні тағы белгілі, мұнда да 3 мал пойызға басылса, бір адам өз абайсыздығы салдарынан қаза болған. Сонымен қатар, теміржол үстіне бөгде зат қойып кеткен бұзақылардың кесірінен 2 рет пойыз тоқтатылған дерек тіркелген. Дегенмен, бұл өткен жылмен салыстырғанда «құдайға шүкір» дегізгендей. 2016 жылдың он айында машинистер 76 рет шұғыл тежеу беріп, 23 ірі қара малы басып кеткен. Жыл бойы тынымсыз жүргізілген профилактикалық жұмыстар нәтижесінде дерек былтырғы кезеңнен 30 ретке төмендеген. – Малмен байланысты тежеулер былтырғыға қарағанда қысқарғанымен, төрт түліктің иесін табуда қиындықтар әлі де бар. Көп жағдайда Маңғыстау локомотив депосының кезекшілері оқыс тежеу хабарламасын кешіктіріп береді. Мысалы, мал баспау үшін 14 наурызда Тамақ-№16 темір жол бекеті аралығында №2101 жүк пойызының шұғыл тежеуге барғанын – 1 күн, 14 мамырда Шетпе станциясы мен №13 темір жол бекеті аралығында № 2835 жүк пойызының жедел тежегішті басқанын – 2 күн, 3 қыркүйекте №13 – №12 темір жол бекеттерінің № 8-пикет тұсында №313 «Атырау – Маңғышлақ» жолаушылар пойызы жасаған тежеуді – 2 күн, 24 мамырда Өзен станциясы 179 км 1-пикетте №3403 жүк пойызының оқыс тоқтағанын – 1 күн кешіктіріп хабарлады. Соңғы мал басу дерегі 29 қыркүйекте жергілікті уақытпен 22.55 сағатта Қызыләскер – Көкбекті бекеті 1012 км 5-пикет маңында болды. Онда түйе малы № 319 «Душанбе-Москва» жолаушылар пойызының алдына шыққан. Полиция қызметкерлері оқиға орнына барғанша түйенің екі құлағындағы электронды сырға кесіліп алынған екен. Үш күн іздестіруден кейін иесі белгілі болды. Яғни, хабар дер кезінде тәртіп сақшыларына жетпесе, малын темір жол маңына жіберіп, қозғалыс қауіпсіздігіне кедергі келтіретін шаруаларды анықтау, олармен жұмыс жүргізу бізге қиындай береді, – дейді бұл туралы желілік ішкі істер бөлімінің әкімшілік полиция бөлімшесінің басшысы Серік Оразғалиев өз пікірін білдіріп. Оның айтуынша, желілік ішкі істер бөлімі теміржол мекемелеріне қажетті ұсыныстарын да беріпті. Өйткені теміржолдағы төтенше жағдай болған жерге біріншілерден болып баратын кім? Әрине – теміржолшылар. Төрт түліктің теміржолда тайраңдап жүруінің бір себебі, қоршалған бөгеттердің сымдары үзілген немесе мүлдем қоршаулардың жоқтығы көрінеді. Әсіресе, Тамақ – №16 темір жол бекеті, Бейнеу – Оазис, Бейнеу – Үстірт, Үстірт – Сай-Өтес және № 11,12,13 темір жол бекеттері мен Шетпе станциясы аралықтарында қоршау жоқтығы жағдайды қиындатып отыр екен.

Бітпейтін дау – сол баяғы төрт түлік...

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл