Ардақты азаматты еске алу
Рахымжанов Өмірбай Құмсаұлы – өз ісіне адал, теміржол саласына бар ғұмырын арнаған білікті маман, абыройлы азамат еді. Оның өмірден өткеніне бір жыл толса да, жарқын бейнесі мен адамгершілік болмысы оны білетін жандардың жүрегінде сақталып келеді. 11 сәуірде марқұм Өмірбай Құмсаұлының рухына бағыштап құран оқылып, ас беріледі.
Өмірбай Құмсаұлы 1952 жылғы 4 қарашада Көкшетау облысы Еңбекшілдер ауданының Сәуле ауылында дүниеге келген. Жоғары білім алып, инженер-механик мамандығын игерген соң еңбек жолын Қарағанды металлургия комбинатында бастады. Кейін өмірінің негізгі бөлігін теміржол саласына арнап, Көкшетау өңіріндегі теміржол кәсіпорындарында түрлі жауапты қызметтер атқарды.
Ұзақ жылдар бойы теміржол саласында абыроймен еңбек етіп, басшылық қызметтерде де өзін білікті ұйымдастырушы ретінде көрсете білді. Ол «Қазтеміртранс» акционерлік қоғамы Ақмола филиалының директоры қызметіне дейін көтеріліп, 2015 жылы құрметті демалысқа шықты. Теміржол саласындағы жалпы еңбек өтілі 39 жылдан асады.
Еңбектегі табыстары үшін бірнеше мәрте марапатталып, «Құрметті теміржолшы» белгісіне, «Адал еңбегі үшін», «Ерен еңбегі үшін» медальдарына және басқа да марапаттарға ие болды.
Өмірбай Құмсаұлы қызметте талапшыл, принципшіл, тәртіпті басшы болса, өмірде мейірімді, парасатты, отбасысына қамқор жан еді. Жұбайымен бірге екі бала тәрбиелеп өсіріп, немерелерін ерекше жақсы көрді. Достықты қадірлей білетін, айналасына сыйлы азамат болды.
Оның адал еңбегі, адамгершілігі мен жарқын бейнесі әрдайым жақындарының, әріптестерінің жүрегінде сақталады.