Келеңсіз оқиға азаяр емес...

Жаңалықтар

27.10.2017, 10:02

Теміржолға жақын орналасқан Шымкент қаласындағы №6 мектептің оқушылары мен осы ауданның тұрғындары жер асты өткелі болса да, теміржолды кесіп өтуді әдетке айналдырған. Осы білім ошағында Шымкент магистральді желі бөлімшесінің бас инженері Мұрат Бидалиев, ОҚО көлік бақылау инспекциясы, темір жол және су көлігіндегі бақылау бөлімінің басшысы Сапарбек Тұрдалин, Шымкент көлік прокуротурасының прокуроры Махан Жәнібеков, Шымкент станциясындағы ЖІІБ полиция капитаны Аида Мақашевалар қатысқан жиында жергілікті халықты осы жаман әдеттен арылту мәселесі қозғалды. Аталған сала мамандары жыл басынан бері аймақтағы теміржол бойында 14 адамды пойыз басу фактісінің тіркелгенін, оның тоғызы дүниеден өткенін, төртеуі жас балалар болғанын ашына жеткізді. – «Тұлпар-Тальго» пойыздары сағатына 120 шақырыммен жүреді. Машинист алдынан адам шыққаны үшін жедел тежегішті басқанымен оңайшылықпен тоқтай алмайды – бір, екіншіден оқыс тежеуден вагондағы ыстық шай тасып жүрген жолаушы күйіп, екінші полкадағылары құлап, жарақат алған жағдайлар тіркелген. Жоғарыдағы пойыз қаққан 14 адамның екеуі кішкентай бала. Біреуі тіпті 3 жаста екен. Кім кінәлі бұл жағдайға? Әрине, біз өзіміз, үлкендердің немқұрайдылығы. Үйлеріңіз пойыз жолға жақын орналасқан ба, алдымен қауісіздікті қатты сақтаңыз, балаларыңызға да үйретіңіз, дағдыландырыңыз, - деген Мұрат Бидалиев адамдардың қауіпсіздігі үшін «Қызылсай – Шымкент», «Шымкент – Қорғасын» телімдері қоршалғанын, Химфарм шағын ауданында да қоршау жүргізілгенін, бірақ адамдар оны айналып жүрудің өзін артық көретініне қынжылыс білдірді. – Темір жол бойында адам басу оқиғасының жылдан жылға көбеюі – мемлекетті алаңдатуда. Жақында Астанада ҚР Бас көлік прокуратурасы, мәжіліс депутаттары, ҚР Инвестиция дәне Даму министрінің қатысуымен өткен координациялық кеңесте теміржолдан өтетін адамдардың қайғылы жағдайы көбейіп жатқаны жайлы мәселе қозғалды. Алдағы уақытта мұндай фактілерді азайтудың амалдары қарастырылмақ. Дегенмен де, әр адам өзіне-өзі сақ болуы тиіс. Бұл Химфарм шағын ауданы бір кездері қаланың шеті болатын. Қазір қала да, халқы да өскендектен орталыққа жақындады. Теміржолды қоршап, үгіт-насихат жұмыстары жүріп жатыр. Бірақ, нәтиже аз. Сендердің араларыңнан келешекте талай ғалым, дәрігер, депутат, әкімдер шығады. Оған жету үшін өздеріңді сақтандырып жүріңдер, денсаулық керек. Осы уақытқа дейін тәртіп сақшылары оқушыларға мыңнан аса ескерту жасаған. Енді айыппұл салса, оның көлемі 6 мың болады. Ол ата-аналарыңа ауыр тиеді, - деді Сапарбек Тұрдалин балаларға қарата. Шымкент станциясындағы ЖІІБ полиция капитаны Аида Дүйсенәліқызының айтуынша, өткен жылмен салыстырғанда жазатайым оқиға екі есеге өскен. Оны ішінде жасөспірімдерді пойыз қағып кету 4 рет, электр тоғына күюі 3 рет орын алыпты. Соңғы уақытта осы мектептің оқушылары кетіп бара жатқан жолаушы пойызына тас атып, әйнегін сындырған. -Енді теміржолшыларға ғана ашылған қоршаудың шағын есігінен өткендерге 6800 теңге айыппұл салынады. Алдынан адам шыққанда пойыздың тежегішін басқаны үшін ата-анасына айыппұл салынады. Оқушылардың теміржолды кесіп өткеніне екі рет ескерту жасап, үшіншіде тағы көрсе профилактикалық тізімге алынады. Ол тізімге алынған деген сөз болашақтарыңа зиянын тигізеді,- деген полиция капитаны балаларға теміржолдан бей-берекет өту де әкімшілік-құқық бұзушылыққа жататынын, ол үшін ата-анамен бірге жауапты болатынын тағы қайталады.

Келеңсіз оқиға азаяр емес...

Басқа да жаңалықтар

Қазақстан теміржолшысы газеті, №32-33 28 сәуір 2026 жыл