Инфрақұрылымды жаңғырту сөз болды
Премьер-министр Олжас Бектенов елдің көлік-транзиттік әлеуетін дамытуға арналған кеңес өткізді. Жиында инфрақұрылымды жаңғырту, цифрлық шешімдер енгізу және саланың ел экономикасындағы үлесін арттыру бойынша міндеттердің сапасы мен орындалуына назар аударылды.
Кеңесте Көлік министрі Нұрлан Сауранбаев, «Қазақстан темір жолы» ҰК» АҚ басқарма төрағасы Талғат Алдыбергенов баяндама жасады. Транзиттік әлеуетті кешенді дамыту аясында теміржол көлігін дамыту мәселелері қаралды. ҚТЖ деректеріне сәйкес, 2025 жылдың қорытындысы бойынша транзиттік тасымал көлемі 33 млн тоннаға жетіп, 2024 жылғы деңгейден 20% өскен.
Транзиттік тасымал үлесі жалпы көлемнің 10%-ын құрады. 2026 жылғы қаңтар-наурыз айларында транзит тағы 14% өсіп, 8 млн тоннадан 9 млн тоннаға дейін жетті, бұл ретте контейнерлік тасымал 6% ұлғайды.
Кеңесте Транскаспий халықаралық көлік бағдарын (ТХКБ) дамытуға назар аударылды. ТХКБ бойынша жеткізу мерзімдерін қысқарту, «Алтынкөл – Поти/Батуми» бағытында өтпелі тарифтер енгізу, Әзербайжан мен Грузиядағы серіктестермен цифрлық жүйелерді интеграциялау жұмыстары жүргізілуде. Қазіргі уақытта жалпы ұзындығы 3,9 мың шақырым темір жолда ірі инфрақұрылымдық жобалар жүзеге асырылуда, оның ішінде «Мойынты-Қызылжар» және «БақтыАягөз» желілерін салу, сондай-ақ «Алтынкөл-Жетіген», «Шалқар-Бейнеу», «Бейнеу-Маңғыстау» және басқа да бағыттар учаскелерін жаңғырту жұмыстары жүргізілуде.
Олжас Бектенов «Бақты-Аягөз» теміржол желісінің құрылысы бойынша ресурстарды жұмылдыра түсуді, нысандағы техника мен жұмыс күшінің жеткіліксіздігі жобаны жүзеге асыруға кедергі келтіріп отырғанын атап өтті. Тиісті шараларды қабылдау қажеттігі айтылды.
Сонымен қатар әлеуетті ашу мақсатында мемлекетаралық түйісу пункттерінің өткізу қабілетін жылына 100 млн тоннаға дейін кеңейту қажеттігі сөз болды. Бұл халықаралық тасымалдауға серпін беріп, өткізу пункттері арқылы өту тәртібін жеңілдетеді.
Үкімет басшысы теміржол вокзалдарын жаңғырту жұмыстарын жеделдетіп, биыл барлық құрылыс-монтаж жұмыстарын аяқтауды тапсырды.