«Жаңа жібек жолы» - Солтүстік Еуропа бағытында

 Кеше Солтүстік Еуропаның ірі көлік торабы бойынша  Коувола (Финляндия)  – Бусловская (Ресей)  – Алтынкөл (Қазақстан) – Сиань (Қытай) бағдары бойынша алғашқы контейнерлік пойыз аттанды. Пойыз 8,5 мың км қашықтықты 10 күнде жүріп өтеді. Пойызды іске қосу рәсіміне Қазақстан атынан Финляндиядағы елші Мұрат Нұртілеуов, Сыртқы істер министрлігі Еуропа департаментінің директоры Айгүл Құспан және «ҚТЖ-Экспресс» АҚ Контейнерлік тасымал департаментінің директоры Алмат Кәрімов қатысты. Жаңа бағдар Қазақстанның Азия және Еуропа елдерімен бірге Елбасының бастамасы – «Нұрлы жол» жаңа экономикалық саясаты және «Бір белдеу – бір жол» қытайлық бастамасымен сабақтастыру аясында салған бесінші дәлізі болды. Қазақстанның әріптес елдері делегацияларының басшылары еліміздің Еуразия кеңістігінде көліктік-логистикалық ынтымақтастықты дамытудағы және сауда-экономикалық байланыстарды тереңдетудегі негізгі рөлін жоғары бағалады. 2016 жылғы желтоқсан айында Қазақстан, Финляндия, Ресей және Қытай арасында қол қойылған «Шығыс көлік дәлізін» ашу туралы келісімді жүзеге асыруға жауапты және жаңа бағдардың бас операторы – «Қазақстан темір жолы» ҰК» АҚ-ның салмақты үлесі ерекше аталды. Коувола қаласының мэрі Марита Тойкка Финляндия мен Қытай арасындағы темір жол қатынасын іске қосу,  жобаға қатысушы елдер үшін тарихи маңызға ие екенін айта келіп, Коувола қаласы Ұлы Жібек жолының «Шығыс қақпасына» айналатынына сенім білдірді. Өз кезегінде, Финляндияның Әділет министрі Антти Хяккянен Қазақстан, Қытай және Ресей тараптарына көрсеткен қолдаулары мен тығыз ынтымақтастықтары үшін Суоми басшылығы атынан алғыс білдіріп, темір жол қатынасының жаһандық экономикада арта түскен рөлін атап өтті. Сонымен қатар, Министр «Жібек жолы өңірлердің әлеуметтік-экономикалық әл-ауқаты, экологияны сақтау және қатысушылар арасында цифрлық технологиялар екпінінде белсенді алмасу үшін қосымша мүмкіндіктер ашып отыр» деген пікір білдірді. Елші Мұрат Нұртілеуов өзінің құттықтау сөзінде Астананың Еуразияда бейбітшілікті сақтауға, тұрақтылықты нығайтуға және экономикалық іс-әрекеттестікті кеңейтуге бейімділігін атап өтіп, осы орайда,  Мемлекет басшысының көптеген бастамалары Азия мен Еуропа арасындағы диалогқа қазірден табысты қызмет етіп жатқанын жеткізді. «Мемлекетті және қоғамды жаңғырту арқылы терең өзгеріс енгізіп жатқан заманауи Қазақстанның өңірлік және жаһандық бастамалары тиімді сауда-экономикалық және инвестициялық байланыстарға ғана емес, сондай-ақ халықтардың жақындасуына, мәдени-гуманитарлық, технологиялық және ғылым-білім саласындағы алмасуға мүмкіндік туғызуда. Қазақстан Республикасының кешенді сыртқы экономикалық және сыртқы саяси бағытының көліктік-логистикалық құрамы мұндай игі қадамдардың жарқын үлгісі болды. ЕАЭО, ТМД, ШЫҰ, АӨСШК-ні қоса алғанда бірқатар көпжақты тетіктер мен институттардың қалыптасуында негізгі актор болған Қазақстан басшысы тараптардың Орталық Азиядағы мүдделерінің теңгеріміне қол жеткізді және еліміздің ұзақ мерзімді дамуын қамтамасыз етті», – деп мәлімдеді қазақстандық дипломат.

Нұрбек БЕКЕН