Апат айтып келмейді

Жаңалықтар

17.11.2017, 11:20

Оқуға 3 мин

Жіңішке станциясында күкірт қышқылы құйылған цистерна аударылып, нәтижесінде үш теміржолшы уланып, оқиға орнында жер қабатын зарарсыздандыру жұмыстары жүргізілді. Бұл Ақтөбеде өткен «Қыс-2017» республикалық оқу-жаттығудан көрініс. Облыс орталығындағы бірнеше нысанда қолға алынған ауқымды шараға Ақтөбе ЖТ бөлімшесі мен магистральді желі бөлімшесінің қызметкерлері де белсене атсалысты. Оқиға шынайы секілді көрініс тапты. Қаптаған құтқарушылар мен өрт сөндірушілер өз міндеттерін бұлжытпай орындап жатыр. Станция маңы бейне бір кино түсіру алаңына айналып кеткендей әсер қалдырды... Шараның өтуін қадағалау үшін келген облыстық төтенше жағдайлар департаментінің басшысы Бауыржан Сыздықов бастаған лауазымды тұлғаларды Ақтөбе жүк тасымалы және магистральды желі бөлімшелерінің жауапты адамдары оқу-жаттығу шараларының барысымен таныстырып өтіп негізгі тәжірибелік жаттығуларға кезек берді. Басынан бастап айтсақ, жаттығу алаңында №2002 пойыздың жолдан шығып кеткені туралы хабарланды. Бір цистерна қапталға ауып, ішіндегі күкірт қышқылы төгіле бастайды. Нәтижесінде сол маңда жүрген үш теміржолшы – машинист көмекшісі, аға шебер және аға электр механигі уланып құлап қалады. Сценарий бойынша үшеуін де химиялық күйік шалады. Станция диспетчері болған жайт жөнінде кезекшіге хабар береді. Сонымен бірге дауыс зорайтқыштың көмегімен станция кезекшісі химиялық зақымдану болғанын теміржол паркінде жүргендерге хабарлайды. Ондаған тонна күкірт қышқылының төгілуіне байланысты өз беттерімен ештеңе жасауға болмайтынын түсінген теміржолшылар дереу төтенше жағдайлар департаментіне хабарлайды. Ол жақта дереус жедел штаб құрылып, төтенше жағдай басқармасы, азаматтық қорғау құрылымдары мен қызметтерінің басшыларына шұғыл тапсырма беріледі. Оқиға орнына жеткен облыстық қоғамдық денсаулықты қорғау департаментінің радиациялық химиялық қорғау звеносы апат болған аумақтағы ауа құрамы мен адамдардың зақымдануын зерделеп, эпицентрден 50 метр қашықтық радиусында қоршау жалауларын орнатады. Желдің жылдамдығы мен бағытын әрдайым бақылауда ұстайтын метеопост және химиялық бекет орнатылады. Бірнеше минуттан соң, қышқыл төгілген алаңды арнайы газдан қорғану маскасы – «противогаз» киген әскерилендірілген күзет пен көліктегі полиция қызметі қоршауға алады. Алты адам, үш көлік жақын маңдағы тұрғын үйлерді аралап, сақтық шаралары жайлы ескертеді. Уланған теміржолшыларды дәрігерлер дереу жедел жәрдем көлігімен алып кетеді. Ал төгілген күкірт қышқылы зарарсыздандырыла бастайды. Көбік шашылып, құм себіледі. Ал рельстен шығып қалған цистернаны пойызды қарлына келтіру қызметі рельске шығарады. Ақтөбе жүк тасымалы бөлімшесі директорының орынбасары Эдуард Құрақбаевтың айтуынша, осыған ұқсас жағдай былтыр Шалқар мен Жем станцияларының арасында болған. «Сутегі пероксиді бар контейнер құлап, улы химикат далаға төгілді. Абырой болғанда, адам зардап шекпеді. Бір жарым сағаттың ішінде улы зат төгілген жер зарарсыздандырылды. Пойыз құрамының басындағы және соңындағы вагондар ағытылып алдынды. Сондықтан бүгінгідей пысықтау шараларының маңызы зор. «Қыс-2017» оқу-жаттығу шараларының теміржолға қарасты мекемелер үшін де үлкен тәжірибе екені түсінікті», – деді ол. Айта кетейік, шараға теміржол құрылымдарының барлығы қатысты, сонымен бірге, 150-ге тарта теміржолшы жұмылдырылды. Барлығы небәрі 30 минутта аяқталды.

Апат айтып келмейді

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл