Аманатқа қиянат болмасын

Жаңалықтар

17.11.2017, 11:24

Бүгінде Семей ЖТ бөлімшесі бойынша желі бойындағы қауіпсіздікті сақтау, құқықбұзушылық факторларының орын алмауы, теміржолшылардың құқықтық сауаттылығын жоғарылату мен қорғау жолында маңызды іс-шаралар өтуде. Мәселен, осы аптада Аягөз бен Шар аталмыш тақырыптарды өзек еткен мәні жоғары жиын өтті. Оған «ҚТЖ» ҰК» АҚ «Семей ЖТ филиалы» директоры Марлен Көкірекбаев, Семей магистральдық желі бөлімшесінің бастығы Айдын Шәукежанов, бөлімшенің бас ревизоры Сайлау Юсупов және Семей көлік прокуроры Медет Несіпбек, Семей станциясы желілік ішкі істер басқармасы мен Семей әскерилендірілген күзет қызметі басшылығы, жергілікті атқарушы билік өкілдері қатысты. Жиын барысында қозғалған негізгі тақырып – тасымалданған көліктің сақталуы, жүк ұрлығының жолын кесу, теміржол қызметіндегі мүліктерге қол сұғуға жол бермеу. Бөлімше басшысы Марлен Кәрімұлы бұл мәселелердің қай кезде де күн тақырыбынан түспей келе жатқанын айта келе, алдағы уақытта да күн тәртібінен түспейтінін ескертті. Бөлімшенің бас ревизоры Сайлау Юсупов арнайы баяндама жасап, желі бойындағы келеңсіз жайттар жайлы нақты фактілерді келтірді. Ал, Семей көлік прокуроры Медет Маратұлы барша теміржолшылар алдында өз мекемелері тарапынан атқарылып жатқан жұмыстар қатарына тоқталып өтіп, құқық құрғау өкілдерінің өзара ықпалдастықта қызмет жасайтынын жеткізді. Сондай-ақ, теміржолшылар үшін қоғамдық қабылдау жүргізіп, пікір-ұсыныстарына да құлақ түрді. Осы тәрізді әскерилендірілген күзет қызметі мен желілік полиция басқармасы басшыларының да аталмыш тақырыпта айтары мол болды. Желі бойындағы тәртіп пен ұрлық фактілерін болдырмау, әсіресе теміржолшылардың өздерінің тасымалданған жүктерге қол сұқпауы, аманатқа қиянат жасамау жөнінде әңгіме өрбіді. Дәл осындай маңызы жоғары жиын теміржолшылар мол шоғырланған Шар станциясында да орын алды. Келелі әңгіме барысында сөз алған бөлімше басшылары мен көлік прокуроры аталмыш бағыттағы жұмыстарды жандандыра түсу туралы әңгіме жүргізді. Нақты деректерден мысал да келтірілді. Шар теміржолшылары да өз тараптарынан ұсыныс-тілектерін жеткізіп, өздерін толғандырған мәселелермен бөлісті. Сондай-ақ, қос шаһарда кездесу өткізген жоғарыдағы топ, мұнымен қоса жергілікті аудан әкімімен де кездесіп, әлеуметтік, құқықтық сала бойынша тұшымды әңгіме жүргізді. Алдағы уақыттағы желі бойындағы атқарылар шаралар қатарын бірлесіп ширату, құқықбұзушылықтың алдын алу бойынша тиімді әрекеттестік жүргізу жайлы өзара уағдаластық жасасты. Жергілікті полиция қызметкерлері де әріптестік танытып, бірге жұмыс жүргізуге бейіл екендіктерін жеткізді.

Аманатқа қиянат болмасын

Басқа да жаңалықтар

Қазақстан теміржолшысы газеті, №32-33 28 сәуір 2026 жыл