Теміржолшылар Құрылтай сайлауының маңызын талқылады
«Қазақстан теміржолшысы» газетінің тілшісі
«ҚТЖ» ҰК» АҚ-да «Әділет» партиясы өкілдерінің алдағы Құрылтай сайлауына қатысты үгіт-насихат жұмыстарына орай теміржолшылармен кездесуі өтті. Спикерлер аталған партияның сайлауалды бағдарламасын таныстырып, сұрақтарға жауап берді.
Жиынға компания Басқарма төрағасының орынбасары Марат Шакенов қатысып, қазіргі таңда еліміз үшін маңызды Құрылтай сайлауына дайындық жүріп жатқан кезеңде бұл оқиғадан теміржолшылар да тыс қалмай, Қазақстанның азаматы ретінде парызын орындап, сайлауға қатысуы маңызды екенін жеткізді.
– Бұл сайлау әр азаматқа өз таңдауын жасап, еліміздің одан әрі дамуына қатысты көзқарасын білдіруге, мемлекет болашағын қалыптастыруға өз үлесін қосуға мүмкіндік береді. Темір жол – Қазақстанның экономикалық тұрақтылығы мен өңірлер арасындағы байланысты қамтамасыз ететін стратегиялық сала. Сондықтан ҚТЖ ұжымы үшін елдің тұрақты дамуы, еңбек адамының мүддесін қорғау және қоғам алдындағы жауапкершілік сезімі ерекше мәнге ие. Сол себепті алдағы сайлауда әрбір азаматтың өз ұстанымын білдіріп, саяси науқанға белсенді атсалысуы маңызды, – деді ол.
Кездесу аясында кандидаттар көлік-логистика саласының қызметкерлерін еңбек адамының құқығын қорғауға, әлеуметтік қолдауды күшейтуге, т.т. бағытталған өздерінің ұстанымын егжей-тегжейлі таныстырды. Сондай-ақ Құрылтай депутаттығына кандидаттар сайлауалды бағдарламаның мазмұны, басым мақсат-міндеттері туралы ақпарат берді.
Жиын қорытындысы бойынша теміржолшылар мемлекеттік басқаруды сапалы жаңарту үшін әрбір азаматтың Құрылтай сайлауына қатысуының маңыздылығын атап өтіп, кандидаттарға сындарлы диалог үшін алғыс айтты.