Алматы – Шу: қазақстандық үлес жүз пайыз!

Жаңалықтар

06.09.2016, 11:44

Оқуға 3 мин

«Нұрлы жол – болашаққа бастар жол» жаңа экономикалық саясаты аясында Алматы-1 – Шу бағытындағы темір жол телімінің екінші желісінің құрылысын жүргізу және электрлендіру құрылысына «Темір жол жөндеу» ЖШС филиалы – «ПМС Бірлік» мекемесі белсенді қатысуда. Тоғыз жолдың торабына орналасқан Шу станциясынан 15 шақырым қашықтықтағы Кемер станциясынан бастау алған жобаны жүзеге асыру бүгінде өте қарқынды жүріп жатыр, жол бойында күнде бір жаңалық. Жол машиналары станциясын «Шалқар – Бейнеу» темір жол құрылысын салып ысылған тәжірибелі маман Рахметов Сәкен Маратұлы басқарады. Кәсіпорында184 адам еңбек етуде. – Бүгінде №5 учаскеде жолды төсеуге жер телімін дайындау жұмыстары жүргізілуде. Ұзындығы бес шақырымды кәсіпорын жұмысшылары өз күшімен төсеп шықты. Торлама-решетка төселіп жатыр. Сондай-ақ жекелеген бригадалар су өткізу құбырлары құрылысын жүргізуде. Ал жоба бойынша барлығы 26 су өткізгіш құбыр және үш көпір бар. Оның 16-сын өз күшімізбен салуымыз керек. Бүгінде оның сегізі салынды. Ал бүгінгі күні біздің алдымызда жетінші учаскеде жұмыстар жүргізу міндеті тұр. Жоспар бойынша бұл учаскеде қыркүйек айында құбырларды салып бітуіміз керек. Одан кейін мердігер компаниялар жер қыртысын дайындайды. Сондай-ақ мұндай жұмыстар алтыншы учаскеде де жүргізілуі тиіс. Ал бізде барлығы жеті учаске бар. Оның бесеуінде, яғни Шоқпар станциясына дейін биылғы жылы пайдалануға беруіміз керек. Бізге қарасты Шу станциясы мен Аңырақай арасы 32 шақырым. Аңырақайдан ары алматылықтар жұмыс жүргізіп жатыр. Ал екінші темір жол телімі құрылысы жүріп жатқан аумақта екі «толаскөз» өтті. Жұмыстар төртінші және бесінші учаскеде 7,3 шақырымда жүрді. Шағылтас төселіп, торламалар салынды. Қазір электрмен жабдықтау және сигнал беру, байланыс қондырғыларын орнату жұмыстары жүргізілуде. Осы жұмыстар аяқталған соң жолды пайдалануға береміз. Құрылыс жұмыстарында қолданылып жатқан материалдардың барлығы дерлік отандық өнімдер. Сондықтан, қазақстандық мазмұн жүз пайыз деп айтуға негіз бар, – деді учаске бастығы. Рельстер Ақтөбе рельс балқыту зауытынан жеткізіліп, өндірістік базада жолға төсеуге дайындалады екен. Тіпті, учаскелер бойынша төсеу кестесі де жасалынып қойған. Шағылтас «Шоқпар-тас» ЖШС-нен тасымалданады. Серіктестік Шоқпар станциясына орналасқандықтан оны тасымалдауда еш кедергілер жоқ. Арман Аязбаев, жоба жетекшісі: – Қазір мұнда жер қыртысын дайындау жұмыстарымен қатар үш көпірдің құрылысы жүріп жатыр. Көпірлер қыркүйек айының 15-де біту керек. Көпірлер құрылысымен қосалқы мердігер «МостстройАстана» компаниясы айналысуда. №№4,5 учаскелерде жұмыстар аяқталды. №№6,7 учаскелерде жұмыстар жыл соңына дейін жүргізіліп, келесі жылға өтеді. Сондай-ақ бүгінде барлық учаске бойынша байланыс және сигнал беру құрылғылары орнатылуда. Жоғарыда айтқан №№6,7 учаскелерді электрмен жабдықтау жұмыстары да келесі жылы жүргізіледі. Қазір Шоқпар және Еспе станцияларында шкафтар орнатылуда. Мұндағы жұмыстар барлық сала қызметкерлерімен кешенді түрде жүргізілуде. 26 тамызға 10 сағатқа үлкен «толаскөз» өтті. Яғни, үлкен екі су өтетін құбыр құрылысы жүргізілді. Біржан Тұрсынбеков, аға жол шебері: – Өндірістік базада рельстерді дайындап, күрделі жөндеу жүріп жатқан немесе екінші телімнің құрылысы жүріп жатқан аумақтарға жөнелтеміз. Жұмыс көлемі жылдық жоспар бойынша бекітілген. Бүгінгі күні межеден қалмай келеміз. Жұмыс көлемі артқан кезде қосымша жұмысшыларды тартамыз. Қазір мұнда отыз адам еңбек етуде. Өзіңіз көріп тұрғандай жұмысшылар арнайы киімдермен толық қамтамасыз етілген. Қауіпсіздік және еңбекті қорғауда да жұмыстар ширақ. Базаның өзінде 16 телім бар. Осы телімдерде көктемгі және күзгі комиссиялық байқау кезінде ағымдағы жөндеу жұмыстарын жүргізіп отырамыз. Ескертулер болса жедел қалпына келтірудеміз.

Алматы – Шу: қазақстандық үлес жүз пайыз!

Басқа да жаңалықтар

Қазақстан теміржолшысы газеті, №81 13 қазан 2026 жыл

Қазір оқылуда

Қазақстан теміржолшысы газеті, №80 09 қазан 2026 жыл