Күзгі байқау жоғары нәтиже көрсетті

Жаңалықтар

03.10.2016, 12:22

Бүгін, қыркүйектің 30-шы жұлдызы күні Семей жүк тасымалы бөлімшесі бойынша ұйымдастырылған ең іргелі науқандық шара – күзгі байқау өз мәресіне жетті. Семей және Жаңасемей станциялары бойынша бастау алған биылғы сын Семей – Локоть телімі бойынша толық қадағалау жұмыстары жүргізілген соң аяқталды. Ағымдағы жылғы тексеру қазірдің өзінде желі бойында нәтижелі жұмыс жүргізілгенін көрсетіп отыр. Байқауға даярлық шараларының ерте қолға алынуы және жол шаруашылығы мен өзге де мекемелерді материалдық тұрғыдан уақытында қамту ісі осындай озық көрсеткішке қол жеткізіпті. Бөлімше басшысы Марлен Көкірекбаевтың айтуынша, байқау барысында бірінші кезекте көктемгі сын кезіндегі ескертпелер тексерілген. Нәтижесінде олқылықтар толық жойылған, анықталған ақаулықтар қалпына келтірілген. Ал екінші кезекте желі бойындағы теміржол нысандарының алдағы қысқа даярлығы назарға алынды. Бұл шара бойынша да жаз бойы өнімді іс жүргізілгені мәлім болды. Шалғайдағы станциялар мен жол айрықтары 90 пайыз қысқа дайын. Қазіргі күні мекемелерге қатты отындар түсіріліп жатыр. –Сонымен қатар, желі бойындағы теміржолшылардың әлеуметтік мәселесі де баса назарға алынды. Белгілі болғандай, сала қызметкерлері үшін елеулі жұмыс жасалынғанын айтып өтуге болады. Мәселен, Үшбиік станциясында теміржолшылардың өз күшімен платформа күрделі жөндеуден өткізілген. Бұл жолаушылар үшін де тиімді. Мұнымен қатар, барлық мекемелердің жылыту жүйелері, қазандықтары да толық тексерілді. Осы ретте бірқатар мекемелер бірігіп, ортақ жылыту қазандықтарының қызметіне сүйенбек. Бұл артық шығынға жол бермей, қомақты қаражатты үнемдеуге мүмкіндік береді. Барлығы да техникалық талапқа сай. Қорыта айтқанда, биылғы күзгі байқау бұрынғы жылдардағыға қарағанда анағұрлым жоғары нәтиже көрсетті, – дейді пікір білдірген бөлімше басшысы Марлен Кәрімұлы. Әсіресе, 116,4 шақырымды қамтитын Шар – Жаңасемей телімі бойындағы жол айрықтары танымастай қайта жаңарыпты. Қызметтік өткелдер толығымен бетондалып, ғимараттар бастан-аяқ әктеліп-сырланған, көз сүйсінерлік. Яғни, нысандардың барлығы эстетикалық талапқа сай. Жолшылар мен локомотившілердің демалыс үйлері мен жылыну үйшіктері де жаңғыртылған. Бірқатар шағын станцияларда теміржолшылардың өз күштерімен балалардың ойын алаңқайлары да әзірленіпті. Алдағы қазан айының 13-і күні күзгі байқаудың қорытындысы шығатын болады. Осыған орай ұйымдастырылатын жиында еңбекті қорғауда, қозғалыс қауіпсіздігін сақтауда және қызметкерлерін әлеуметтік тұрғыдан қамтуда үздік саналған мекемелерді басшылық тарапынан марапаттау туралы ұсыныс көтерілуде.

Күзгі байқау жоғары нәтиже көрсетті

Басқа да жаңалықтар

Қазақстан теміржолшысы газеті, №32-33 28 сәуір 2026 жыл