Кітап алыңыз, жолаушы...

Жаңалықтар

25.10.2016, 11:16

«Кітап алыңыз... кітап...». Семей теміржол вокзалына жолы түскен жолаушы ерекше жағдайдың куәсі болды. Ел Тәуелсіздігінің 25 жылдық торқалы тойына орай Семей жүк тасымалдау бөлімшесі бойынша тағы бір креативті жаңа бастама қолға алыныпты. «Жолаушы, жолға кітап ал!» атты акция аясында семейліктер жолаушыларға тегін кітап таратты. Семей теміржолы бойынша «Тәуелсіздік мерейтойына – 25 игі іс» жобасы басталғанын, оның мәдени-қоғамдық, әлеуметтік бағыттағы түрлі шаралармен апта сайын толығып отырғанын осыған дейін де жазған болатынбыз. Тұңғыш рет қолға алынған аталмыш акция да мерейтой құрметіне арналды. Ерекше идеяның авторы бөлімше басшысы Марлен Көкірекбаев. Бұл күні Семей теміржолына қарасты барлық мекемелердің кәсіподақ комитетінің қызметкерлері вокзалда кітаптардың жайма-көрмесін ұйымдастырды. Сапарға аттанғалы тұрған және вокзалға аялдаған пойыздан бірер минутқа түскен жолаушылар өздері ұнатқан, таңдаған кітаптарының бірнешеуін тегін алып кетіп жатыр. «Осыған дейін вокзалда анау алыңыз, мынау алыңыз» деп тамақ, сусын, басқа да керек-жарақ ұсынғандарға көзіміз үйренген ғой, бүгін міне, «кітап алыңыз, кітап...» дегенге таң қалып қалғанымыз рас, сатып жатқан жоқ, тегін таратуда. Мен екі бірдей сирек кездесетін қазақ жазушыларының романын алып қуанышымда шек жоқ, – дейді Алматыға кетіп бара жатқан егде кісі. Осыған дейін қала бойынша «Кітапханаға кітап сыйла!» атты акция өткізіліп, оған желі бойындағы барша теміржолшылар қызу атсалысқан болатын. Нәтижесінде 3 мыңның үстінде қазақ және орыс тілдеріндегі кітаптар жиналыпты. Жұртшылықтан сыйға алынған классикалық шығармалар аса көлемді, кітап қоры сан алуан. Тіпті толық кітапханасын сыйға тартқандар да болыпты. Арасында аға буын сүйіп оқыған Әзілхан Нұршайықовтың «Махаббат қызық мол жылдар», Оралхан Бөкейдің «Зымырайды пойыздар» сынды туындыларынан бастап, Ілияс Есенберлиннің «Көшпенділері», Әбіш Кекілбаев пен Мұхтар Мағауиннің тарихи романдары сынды сирек кездесетін кітаптар да бар екен. Міне, осынау көркем әдебиеттердің барлығы кітап оқуға пейіл танытқан жолаушыларға тегін үлестірілді. Кітаптардың ортасына сәт-сапар тілегі жазылған буклеттер, Семей теміржолының логотипі қоса салыныпты. Жолаушы халықпен бірге рухани қазынаны жолсеріктер де құшақ-құшақ алып жатты. «Пойыздағы жолаушылар бос уақыттарында оқығысы келсе үлестіріп беріп, кейін қайта жинап алып отырамын. Он шақты кітап алдым, шағын кітапхана жасақтаймын», – дейді Алматыға бет алған пойыз жолсерігі. Яғни, ендігі аралықта Новосібір – Алматы, Павлодар – Алматы бағытындағы жолаушылар пойызында жолушыларға арналған шағын кітапхана пайда болды деген сөз. Қазіргі таңда, технология қарқынды дамып, ұялы байланыс пен ғаламтор өмірімізден елеулі орын алған заманда әсіресе жастардың кітап оқуға деген ынтасы азайғанын байқауға болады. Сол себептен, ел Тәуелсіздігі мерейтойы аясында осынау ерекше акцияны қолға алдық. Бұл шара жолаушы қауымның рухани байлығын молайтып, жол қысқартып, сапарларының мазмұнды өтуіне септеседі деп сенеміз. Сондай-ақ, кітаптар өмірін ұзартып, еліміздегі кітапқұмарлар қауымының санын да арттыра түседі деп үміттенеміз, – дейді бөлімше басшысы Марлен Кәрімұлы. Тың да ерекше бастама көтерген семейліктер арқасында ендігі жерде Семей теміржолының логотипімен сыйға берілген кітаптар Қазақстанның ғана емес, көрші Ресейдің де пойыздарын аралап, оқырмандар санын көбейте берері анық. Кітап алыңыз, жолаушы...

Кітап алыңыз, жолаушы...

Басқа да жаңалықтар

Қазақстан теміржолшысы газеті, №66 21 тамыз 2026 жыл