Телім бойында күнде жұмыс...

Жаңалықтар

11.11.2016, 11:43

Оқуға 2 мин

Ірілендірілген Арыс жол дистанциясына қарайтын Түркістан телімінің №31, №32 айналым жолының жолшылары әр күні жоспарлы кестеге сай жолды ағымдағы жөндеуден өткізуде. №32 айналым жолының бригадирі Құрбан Берсүгіров әріптестерімен депоның жанындағы рельстерді Р50-ден Р65-ке ауыстырып жатты. Бұрын қолданылғанымен жарамды 12,5 метрлік рельстер ұзақ уақытқа шыдас береді деседі. Одан кейін шпалдарды көтеріп, шағыл тастарды нығыздады. Жиырма екі жыл жолшы қызметінде жүрген Құрбан ағамыз сияқты майталман мамандар Түркістанның сары аязы мен шілденің аптап ыстығына қарамастан, үнемі екі рельс бойының қауіпсіздігін «күзетіп» келеді. Ал № 31 айналым жолының бригадирі Асылбек Тұрысов болса, біз барғанда Ерман Едігеев пен отыз жылдық «стажы» бар Айдарбек Айтахановтың көмегімен жарамсыз бөрене шпалдарды шетінен жаңалауда екен. Ұзындығы 2,75 метр, салмағы 50 келі болатын шпалдарды бір жылдық еңбек өтілі бар Ерман Асылханұлы айқастырмалы құралмен, яғни «қайшымен» суырып алып, астындағы топырағын тегістеп жатты. Бригадирдің айтуынша, бір жолшы күндігіне бес шпалдан ауыстырады. Үш маман сол күні 15 шпалға дейін жаңартты. Станцияның «Солтүстік» алқымында №31 айналымының жол шебері Махмұт Минамуддинов бір топ маманмен №54 бағыттама бұрманың үстіндегі рельстің шаблонын есептеп, кеңейген тұсын тарылтты. – Осы тұстағы екі рельстің арасы 1520 мм болу керек, бірақ бөрене білеулердің ескіруінен 1530 мм-ге кеңейіп кеткен. Соны бастапқыдағы талапқа сай етіп келтірдік. Қатты тартпасақ та болар еді, бірақ бөренелер жаңарғанша ол қайтадан кеңеюі мүмкін. Соңғы күндері отыз шақты кеңейген ағаш шпал мен білеулердің бойындағы рельстің шаблондарын қалпына келтірдік, – деп жолшылар жұмысынан сыр шертті жол шебері.

Телім бойында күнде жұмыс...

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл