Өзара келісімге келді

«ҚТЖ-Жүк тасымалы» АҚ Шымкент темір жолына қарасты  Мақтарал станциясында екі аптадан бері тұрып калған мақта тиелген жүк вагондарына қатысты дау шешілді. Осы мәселе бойынша Қазақ мақта қауымдастығы Кәсіпкерлер палатасына шағымданып, Мақтаарал бекетінде тұрып қалған 4 мың тонна жүгі бар вагондар проблемасын шешіп беруді сұраған. Бекет қызметкерлері бәріне басшылық жауап береді деп, мәселеге қатысты мардымды ештеңе айтпаған. ОҚО Кәсіпкерлер палатасы дереу «ҚТЖ-Жүк тасымалы» АҚ Шымкент бөлімшесі басшылары мен жүк қожайындары болып саналатын мақта компаниялары өкілдерінің қатысуымен жиналыс өткізген. Онда, Қазақстанда бүгінгі таңда мақта талшықтарын сақтау, тасымалдау, таңбалау және қаптау бойынша мемлекеттік стандарттың жоқ екені белгілі болды. Осыған орай, бүгінге дейін КСРО Мемлекеттік комитетінің 1986 жылғы мемлекеттік стандартына сүйеніп келген. Ал, ол өз кезегінде, өзінің заңды күшін жойған. «ҚТЖ-Жүк тасымалы» АҚ Шымкент бөлімшесі басшылары, егер компания келесі талаптарды орындаса, вагондарды жөнелтуге рұқсат беретіндіктерін жеткізді:

1. Халықаралық теміржол жүк хабарламасы келісіміне сәйкес, вагонның техникалық талаптарға сай болу керек; 2. «ҚТЖ-Жүк тасымалы» АҚ бекіткен көлем эскизі, оны тиеу нұсқамасы бар болуы керек; 3. Қауіпсіздік техникасы бойынша оқыту өткізіліп тұруы тиіс.

Қазақ мақта қауымдастығы өкілдері талаптардың орынды екенін мойындайды, себебі, мақта талшықтары – жеңіл жанатын өнім. Осылайша, ОҚО Кәсіпкерлер палатасы жүк тасымалдаудың Шымкент бөлімшесіне, жоғарыда аталған талаптарды жүк тасымалдаушылар орындағаннан кейін, мақта талшықтарын бірден тиісті орнына жөнелту туралы өтінім білдірген.  Бұдан бөлек, Палата сарапшылары Қазақ мақта қауымдастығымен және ҚТЖ-мен бірге, ҚР бойынша мақта талшықтарын сақтау, тасымалдау, таңбалау және қаптау жөнінде мемлекеттік стандарттарды әзірлеу бойынша байланыс тобын құру туралы шешім қабылдады. Ал бірнеше күн бұрын мақта талшықтары тиелген жүк вагондары сапарын жалғастырып, тиісті орынға жеткізілген. Кемел МАРАТ, Астана