Жамбыл облысында су тасқынынан бүлінген көпірлер шұғыл қалпына келтірілді
Жамбыл облысы аумағындағы Меркі ауданының тауларына қар түсіп, еріген су мен көп мөлшерде жауған жауын-шашынның салдарынан Аспара-Шу аралығындағы теміржол көпірі мен автожолға зақым келіп, халықты біраз әбігерге салды. Жексенбіден дүйсенбіге қараған түні апат салдары жойылып, пойыздар қозғалысы қалпына келтірілді. Мұндағы су өткізуге арналған жасанды құрылымдар толық режимде жұмыс істеп тұрғанымен, теміржол көпірінің тіректері судың үлкен көлемі мен қысымына шыдас бермеді. Сол себепті аймақта жүк және жолаушылар пойыздарының қозғалысы бірнеше сағатқа тоқтатылды. Нақтылай айтқанда, №712 Шымкент-Нұр-Сұлтан-Нұрлы жол бағытындағы, №78 Маңғыстау-Алматы-2, №42 Атырау-Алматы-2, №23 Алматы-Ақтөбе, №29 Алматы-Атырау, №33 Алматы-2-Ақтөбе бағыттары бойынша жолаушылар пойыздары жүру уақыттарынан кешіккен. Төтенше оқиға орын алысымен Аспара-Шу аралығындағы пойыздардың қозғалысын жедел қалпына келтіруге аймақтағы теміржолшылар жұмыла кірісті. Шу жол дистанциясының басшысы Ғалымбек Батырбековтің айтуынша, таудан аққан су көпірдің бір жақ қапталын бұзып өткен. «Төтенше оқиға орын алған күні кешкі 18.00 шамасында аталған тұстан өтетін екі жолды да жапқан болатынбыз. Зардаптарды жою үшін арнайы теміржол және автотракторлық техникаларды жұмылдырдық. Қажетті материалдарды, шпал, рельс, қиыршық тастар мен кесек тастарды да дер кезінде жеткіздік. Оқиға орнында 75 жолшы түні бойы жұмыс істеді. Қазіргі таңда Аспара-Шу аралығындағы теміржолдарды қалпына келтіру жұмыстары аяқталды, пойыздар жүріп жатыр», – деп мәлімет берді Ғалымбек Тұрғанбекұлы. Теміржолшылардың жедел іс-қимылы нәтижесінде түнгі сағат 02.15-те бір жол бойынша пойыздар қозғалысы ашылған. Қалпына келтірілген жолдан алдымен контейнерлік пойыз өтсе, одан кейін Шымкент-Нұр-Сұлтан бағытындағы №712 «Тальго» жолаушылар пойызы өткен. Ал, қарсы қозғалыс жолы таңғы сағат 8.20-да пайдалануға берілді. ҚТЖ мамандары апатты жағдайды жөндеу-қайта қалпына келтіру жұмыстарына теміржолшылардан бөлек, басқа да құрылымдар белсене атсалысып, жедел әрі үйлесімді жұмыс істегенін мәлімдеді. Сондай-ақ барлық станцияларға пойыздардың кешігу мерзімі мен себептері туралы алдын ала ақпарат берілген. Өңірде қалыптасқан ахуалға байланысты қауырт желі де іске қосылды.