Жамбыл темір жолында былтыр өндірістік жарақат болған жоқ
Өткен жылы Жамбыл жүк тасымалы бөлімшесі мен магистральдық желісінде қозғалыс қауіпсіздігін бұзудың 13 жағдайы тіркелген: пойыздың 1 сағаттан артық кешігуі 3 мәрте қайталанса, 1 рет жолдағы қарсы келу жағдайы орын алған.
Сонымен қатар, пойыздың адамдарды қағып кету дерегі 3 мәрте, жол-көлік оқиғасы 2 рет, мал қағып кетуі 1 рет, басқа да бұзушылықтар тіркелген. Бір тәуірі, өндірістік жарақаттану деректерін төмендетуге қол жеткізілген. Былтыр бөлімшеде бірде-бір өндірістік жарақаттану орын алмағаны – еңбек қауіпсіздігін қамтамасыз ету, қызметкерлердің денсаулығы мен өмірін сақтауға бағытталған іс-шаралар жемісі деп бағалаған жөн.
Бөлімшеде пойыздар қозғалысы қауіпсіздігінің жай-күйін жақсарту мен тасымалданатын жүктердің сақталуын қамтамасыз ету бағытында бірқатар іс-шаралар қолға алыныпты. Айталық, станциялар мен бөлек пункттерде 65 техникалық тексеру жүргізіліпті. 72 селекторлық кеңесте осы бағыттағы көрсеткіштер сараланып, зерделенген.
Сонымен қатар, полиция өкілдерінің, көліктік бақылаудың аумақтық органдарының, бөлімше шекарасындағы қызметтердің қатысуымен үйлестіру кеңестерінің 4 отырысы өткен. Онда бірлескен іс-шараларды өткізу негізінде бірқатар мәселелер қаралған. Сонымен қатар түсіндіру жұмыстары 810 азаматты қамтып, теміржолдардың қауіптілігі мен қағидалары туралы әңгімелер жүргізілген, жадынамалар мен бейнероликтер таратылып, теміржолдардан өту ережелері сөз болған.
Станцияларда технологиялық процестерді нормативтік-техникалық қамтамасыз ету бойынша желілік қызметкерлердің лауазымдық міндеттерін орындау мәніне 98 жоспардан тыс тексеру жасалып, ай сайын құрылымдық кәсіпорындар басшыларының адамдардың және малдың станциялық жолдарға шығып кетуінің алдын алу тақырыбындағы тыңдаулары өткен. Стандартты емес жағдайлар туа қалған жағдайда персоналдың іс-қимылы бойынша жоспардан тыс 15 техникалық сабақ ұйымдастырылыпты.