Оңтүстіктегі қалпына келтіру пойызының мамандары дайындықтарын пысықтады

Пойыздар қозғалысы күндіз-түні бір тынбайтын темір жол бойында, өкінішке орай, апатты жағдайлар болмай тұрмайды. Жылжымалы құрамның жолдан шығып кетіп, вагондардың аударылып қалуы, соқтығысуы, құлап кетуі сынды қозғалыс қауіпсіздігіне нұқсан келтіретін жағдайлар аз емес.

Шымкент-Арыс-Түркістан-Сарыағаш аралығында теміржолдың «жедел жәрдемі» қызметін атқаратын №39 қалпына келтіру пойызының құрылғанына биыл 86 жыл. Демек, темір жолдағы апатты оқиғалардың зардабын жойып, қозғалыс қауіпсіздігіне қызмет етіп келе жатқанына да сонша жыл. ВП-39 – аймақтағы пойыз апатын жоюмен қатар облыс көлемінде орын алған төтенше жағдайлар мен табиғи апаттар кезінде де көмекке келетін сенімді кәсіпорын. Техникалық базасына келсек, германиялық екі жүк көтергіш кранның жүк және жолаушы вагондарын көтеретін қауқары бар. Қуаты көтергіш краннан бір мысқыл да кем емес ауыр техника – Т-330 тракторлары да қираған, бүлінген шпалдар мен рельстерді жинап, жолды тазалап, апат зардабын жоюға қабілетті, хэш гидроқұрылғысы тағы бар. Қалпына келтіру пойызының штатында бүгінде 18 адам жұмыс істейді. Олардың бәрі – он-жиырма, одан да көп жыл төтенше жағдайда жұмыс істеп шыңдалған тәжірибелі мамандар.

Жуырда ВП-39-да жылжымалы тіректерге ЕДК- 500/1 және ЕДК-300/2 крандарын орнату бойынша іс-қимылдарды пысықтау, көтергіш гидравликалық қондырғының жұмысын талдаған оқу-жаттығу өтті. Онда жұмысшы-қызметкерлердің жұмыс істеу дағдысы мен шеберлігі сыналып, ХЭШ көтергіш гидравликалық қондырғымен жұмыс бойынша практикалық сабақтар да өткізілді. Мұндай оқу-жаттығулар қалпына келтіру пойызының жұмысын шыңдап, төтенше жағдайларға дайын болуға септігін тигізері сөзсіз.