Текесу станциясындағы құрметті теміржолшы пайғамбар жасына жетті
Шымкент қаласы бойынша меншікті тілшісі
Текесу – Шымкент теміржолындағы мұнай өнімдерін жөнелтумен айналысатын, ең көп жүк тиелетін, қызметі аса күрделі де қауырт станция. Мұнда күніне 250-300 вагонға жуық мұнай өнімдері артылады.
Оның ішінде жанар-жағармай, керосин, газ, т.б. бар. Тәулігіне бес пойыз қабылдап, жеті пойыз жөнелтетін станцияда 51 адам еңбек етеді. Жуырда ұзақ жылдар осы станция ұжымын басқарып келген Құрметті теміржолшы Хайрулла Сәрсенов 63 жасқа толды. Шымкент жүк тасымалы бөлімшесінің ұжымы мен салалық кәсіподақ комитеті Хайрулла Амантайұлын мерейтойымен құттықтап, тарлан теміржолшыға құрмет көрсетті.
Хайрулла Сәрсенов – теміржолға 40 жылдан астам уақыт қызметі сіңген, білімді де білікті, аймаққа беделді азамат. Техника ғылымының кандидаты ғылыми атағын қорғаған теміржолшының Текесудай жұмысы ауыр да күрделі станцияны талай жыл басқаруында да мән бар екені даусыз. Оның іскерлік, біліктілік, кішіпейілділік, табандылық сияқты қасиеттері ескерусіз қалған жоқ. «Адал еңбегі үшін» және «Ерен еңбегі үшін» медалімен, «Құрметті теміржолшы» төсбелгісімен марапатталып, Шымкент қаласының Құрметті азаматы атанған.
Х. Амантайұлы – туған қаласы Шымкенттің көркейіп, гүлденуіне де өз үлесін қосқан жан. Жиырма жыл бойы қалалық мәслихат депутаты ретінде талай игілікті де сауапты істерге мұрындық болды.
Шымкент жүк тасымалы бөлімшесі мен Текесу станциясының ұжымы Хайрулла Амантайұлын мерейтойымен құттықтап, ізгі тілектерін білдіріп, иығына шапан жапты. Әріптестер теміржол бойында естелік суретке түсті.