Үздіктерді үлгі етті
Корреспондент газеты «Қазақстан теміржолшысы»
Төл мереке қарсаңында Көкшетау теміржолында үздік қызметкерлер марапатталды. Ведомстволық марапаттар мен Алғыс хаттар өңірдің 188 теміржолшысына берілді.
Қаладағы «Достар» мәдениет үйінде өткен мерекелік жиында «Адал еңбегі үшін» төсбелгісімен 9, «Үздік маман» белгісімен 6, «Кәсібі бойынша үздік» белгісімен 8 теміржолшы марапатталса, Ұлттық компания Басқарма төрағасының Құрмет грамотасына 3 қызметкер, Алғыс хатқа 2 маман ие болды. «Үздік басшы» атағына Жаңа Есіл локомотив пайдалану депосының бастығы Константин Цой лайық деп танылды. «Қозғалыс қауіпсіздігі үшін» белгісі Бурабай курорты вагон пайдалану депосының инструкторы Амангелді Сарсеновке берілді. Сонымен қатар «Магистральдық желі дирекциясы» филиалының марапаттары 5 адамға табысталды.
– Теміржолдағы еңбек адамының қажыры мен қайратқа толы қызметі арқасында ел экономикасының барлық салаларын дамытуға үлкен үлес қосылуда. Осы бағыттағы бізге жүктелетін жұмыстың жүгі ауыр. Себебі оның ар жағында адамдар өмірі мен денсаулығының қауіпсіздігі тұр, – деді Ақмола ЖТ бөлімшесінің директоры Әділхан Дәкенов. Бөлімше директорының атынан марапаттар өңірдің 126 теміржолшысына берілді.
Одан бөлек Ақмола ЖТ бөлімшесіне және магистральдық желі бөлімшесіне қарасты 357 теміржолшы «Қазақстан темір жолына 25 жыл» мерейтойлық белгісімен марапатталды.