Станцияда осы жылдың алғашқы сенбілігі өтті
«Қазақстан теміржолшысы» газетінің тілшісі
Қытаймен шекарадағы Достық станциясында көктем келісімен жаппай тазалық жұмыстары басталды.
Биылғы алғашқы сенбілік наурыздың 3 күні өтті. Оған станцияның жүзден астам қызметкері жұмылдырылып, олар станция аумағындағы сұрыптау парктеріне, әкімшілік ғимараттарға, жол бойына бөлініп, тазалық жұмыстарын жүргізді.
– Қыстай жиналған қоқыстың бәрін бір жерге жинап, станция ғимараттарының айналасын тазарттық. Екі күн қатарынан 100-120 адам қатысты. Бірінші күні сыртта жауын-шашын болғандықтан ғимараттар ішіндегі тазалыққа көңіл бөлдік. Станцияның 2 әкімшілік ғимаратын тазалап, 70-ке жуық қоқыс қабын шығардық. Бүгін екінші күні тар паркті, теміржол бойын, жер төсемдерін, жол аралықтарын қоқыстан тазаладық. Әрі қарай Сұрыптау паркінің, қызметтік тұрмыстық корпустың тазалығын жүргіздік. Қурап қалған жапырақтар, бұталар, ағаштар бұтақтарының бәрін жинап, трактормен полигонға жеткізіп, барлығы 4 куб қоқыс шығардық, – дейді станцияның өндірістік қауіпсіздік секторы бастығы Халида Сарекенова.
Келесі сенбіде станциядағы барлық құрылымдық мекемелердің қызметкерлері шығып, тек теміржол аумағын ғана емес, жалпы Достық ауылының да шырайын кіргізбек.