Балалар шаттанған күн
Атырау облысы бойынша меншікті тілші
Балалар күніне орай Атырау өңірінде бірқатар шаралар ұйымдастырылды. Мақат локомотив пайдалану депосында өңірлік кәсіподақ комитетімен бірлесе машинист және оның көмекшілерінің балаларына ата-анасының жұмыс орындарын көруге мүмкіндік жасалды.
Балаларға әуелі темір жолдың қауіпті аймақ екені, қай жерлерде жүруге болмайды, қандай жерде рұқсат етілген, қауіпсіздікті сақтау үшін қандай талаптарды орындаулары тиіс екендігі түсіндірілді. Сондай-ақ олар депо басшылығымен танысып, локомотив бригадаларының жұмысы неден тұрады, қалай жұмыс істейді, жүк тепловозбен қалай тасымалданады, депошылардың темір жолға сіңіріп жатқан еңбегі және тағы басқа көптеген мағлұмат алды. Соңынан балаларға тәтті тағамдар мен сусындар берілді.
Атырау сигнализация және байланыс дистанциясы бойынша Атырау, Аққыстау, Ганюшкино, Афанасьев, Исатай станциялары бойынша дистанция қызметкерлерінің аз қамтылған отбасы балаларына ойыншықтар, басқа да сыйлықтар табыс етілді. Мұнда үлкендер барлығы 35 баланың жүзіне қуаныш ұялатты.
Атырау жол дистанциясы бойынша да 40 балаға сыйлықтар берілді. 31 мамыр күні 150 бала алдымен «Темір жол - қауіпті аймақ» деген тақырыптағы еңбек қорғау бөлімі мамандары дайындаған арнайы шараға қатысып, кейін үлкендердің бақылауымен қаладағы «Мармелад» ойын-сауық кешенінде алаңсыз асыр салып ойнады. Атырау жүк тасымалы бөлімшесі кәсіподақ ұйымының төрағасы Боранбай Қамиевтің атап өткендей мұндай сыйлықтар беру, ойындар ойнату шаралары аймақтың темір жол саласындағы барлық мекемелерінде өтіп жатыр.
