Қызылорда жол дистанциясының теміржолшылары сенбілікке шықты

Теміржол аймағының экологиялық ахуалына кері әсер ететін жағдайларды жою пойыздардың қауіпсіз қозғалысына зиян тигізетін нәрселердің алдын алуда өте маңызды. Осыған орай ұжымның кәсіподақ ұйымының төрайымы Ғалия Ноғайбаева мен ұйым белсенділері мен Қызылорда жол дистанциясының теміржолшылары дистанция бойынша жаппай сенбілікке шықты.  

Сенбілік жұмыстары дистанцияға бекітілген қаланың Бегім ана көшесі бойында да жүргізілді. Мұнда көше бойындағы арықтар арам шөптерден тазаланып, дарақталып өскен ағаш пен бұталар таралып кесіліп, ретке келтірілген. Ағаш түптері әктеліп, қоқыстар арнайы көлікпен қоқыс қабылдайтын арнайы орындарға жөнелтілді.

– Дистанция теміржолшылары экологиялық тазалықтың сақталуы үшін өз жұмыс орындарын айнадай таза ұстағанмен, кейде телімдердегі жол бойына тазалық жасауға тура келеді. Оның үстіне күз айларында тоқтаусыз соғатын аңызақ жел жол бойынан шалғай жерлерде, қалтарыста қалып қоятын қоқыстардың күлін көкке көтеріп ластамас үшін мүмкіндігімізше дистанция бойынша сенбілік жасадық. Апта соңында ұйымдастырылған сенбілікке күнделікті жұмыстан тыс дистанция еңбеккерлері жұмылдырылды. Жұмыс бөлмесінен бастап, аула, цех тіпті қала көшесіне дейін тазалық жұмысын жасаған ұжымдастарымызға кәсіподақ ұйымы атынан ыстық бәліш пен салқын сусын жеткізіліп, рухани қолдау көрсетіп, әріптестеріміздің алғысын алдық, – деді кәсіподақ ұйымының төрайымы Ғалия Ноғайбаева.

Алдымен мекеме ауласындағы ретсіз жатқан заттарды жиыстырудан басталған сенбілік бара-бара бекеттегі жолдардың бойын тазалауға ұласты. Одан кейін тазалық жұмыстары дистанция телімдері бойынша да жалғасты. Бірақ бұл жолдың бабын күнделікті жасаумен шұғылдануы тиіс жолшылар үшін қосымша жұмыс секілді көрінгенмен, экологиялық тазалықты сақтау әр пенденің қажеттілігі болғандықтан, бұған да бой үйреніп келеді.