Бұл мереке жылдағыдан өзгерек

Ел шығысындағы теміржолшылар қауымы биылғы Наурыз мерекесін жылдағыдан өзгеше форматта, ерекше леппен атап өтті. Аталған шараға бөлімше көлемінен, байтақ желі бойынан да қонақтар келді.  

Мерекелік шараға жиналған теміржолшы ардагерлерді қала басшылығы арнайы келіп құттықтап, жиналған жұртшылық алдында мерекелік лебіз білдірді.

Барша қалалықтар мен қонақтар алдында әуелгі кезекте Семей теміржолы бойынша ардагерлер кеңесінің төрағасы, Құрметті теміржолшы Қырықбай Әлсейітов құттықтау сөз алды.

«Өткен жыл семейлік теміржолшылар үшін мейлінше табысты болды. Үлкен ұжым абыроймен еңбек етіп, биік белестерді бағындырды. Биыл да осы үдеден табыламыз деген сенімдемін. Алдағы уақытта да бірлесе еңбек етіп, аймағымызды дамытудың жаңа белесіне шығарамыз деп білемін. Отбасыларыңызға амандық, құт-береке тілеймін! Ұлыс оң болсын, ақ мол болсын!», – деп жылы лебізін білдірді.  

Сонымен қатар, бөлімше басшысы Алмас Сейсемқанов пен Семей магистральдық желі бөлімшесінің бастығы Айдын Шәуежанов та ізгі тілегін білдірді.  

Айта кетерлігі сол, вокзал алаңында теміржол мекемелерінің ұйымдастыруымен 9 киіз үй тігіліп, әрқайсысы қазақтың бай мәдениетін, тарихы мен дәстүрін паш ететін ерекше мазмұнмен безендірілді. Әр үйдің өз «алты ауызы» әнші-жыршылары келушілерді ұлттық өнермен сусындатты.  

Келушілерге мол дастархан жайылып, наурызкөже мен қымыз ұсынылды. Сондай-ақ, ақ кимешекті әжелер қауымы баршаға арнап бауырсақ үлестіріп шықты.  

Бұл күнгі мерекелік шара тек көңіл көтеруге емес, ұлттық құндылықтарды дәріптеу, дәстүр сабақтастығын жалғастыруға да арналды. Бұл ретте Наталья Мешкова бастаған кәсіподақ ұйымының белсенділері түрлі спорттық сайыстар мен ұлтттық ойындар ойнатып, жеңімпаздарға жүлде таратты.

Мұнымен қатар, теміржол вокзалы алаңындағы үлкен сахнада ұлттық нақыштағы әндер шырқалып, би де ұйымдастрылды.

Мерекелеуге жиналған көпшілік теміржолшылар қауымының жомарттығы мен бабалардан қалған мәдени мұра мен салт-дәстүрге берік екендігіне тәнті болғаны анық.