Теміржолшысы көп қала

Арыс қаласының орталық алаңында Әз-Наурыз кең көлемде тойланды. Мұнда тұратын 45 мың тұрғынның 5 мыңнан астамы теміржол саласының түрлі мекемелерінде еңбек етеді. Сондықтан да бұл Түркістан облысы бойынша ең көп теміржолшы тұратын қала санатына жатады.

Қала деңгейінде кең ауқымда тойланған мерекеде Арыс теміржол торабының мекемелері – Арыс станциясы мен ВЧД-30, ТЧЭ-32, ПЧ-54, ШЧ-38 және Әскерилендірілген теміржол күзеті ұйымының өкілдері бірнеше күйіз үйден құралған «Теміржолшылар ауылын» тіктеді. Сөйтіп, оның ауласында ұлттық спорттың 5 түрінен асық ату, арқан тарту, ләңгі тебу, қол күресі және қошқар көтеру сынды сайыстар өткізді. Ал «Қазкөліккәсіп» ҚБ бірлестігінің Шымкент филиалы ұжымының атсалысуымен өнер көрсеткен әрбір қатысушыға бағалы сыйлықтар табыс етілді. Келген қонақтарға ұлттық тағамдардан дәм ұсынып, құрмет-қошеметтің үлгісін көрсетті. Ән, жыр айтып, өз өнерлерін паш етті.

Сондай-ақ сән-салтанаты жарасқан ақ боз үйге қала әкімі Қ.Маңқараев та елмен бірге бас сұғып, жергілікті теміржолшыларды айтулы Әз-Наурыз мейрамымен құттықтады. Ал күн ұзаққа созылған мерекелік жиында өнер көрсеткен теміржолшыларды НОД-9 мекемесінің бас инженері Ілияс Нұржанов марапаттап, бағалы сыйлықтар мен алғыс хаттар табыстады.

Айта кетейік, Арыста Наурызнама онкүндігі аясында ұлттық киімдер күніне арналған «Наурыз көктем – Этно Fashion» атты ерекше флешмоб пен шеру өткен болатын. Қаланың басты көшелерінің бірі – Әл-Фараби даңғылы бойынан бастау алған сәндік шеру Орталық алаңда қорытындыланды. 500-ге жуық қала тұрғыны мен қонақтарды қамтыған бұқаралық сипаттағы мұндай жиынға арыстық теміржолшылар да белсенді қатысты.