Түбек жұрты Наурыз мейрамын түгел тойлады
Маңғыстау облысы бойынша меншікті тілші
Ұлыстың ұлы күнінде түбек теміржолшылары аудан орталығындағы алаңға үй тігіп, Мұнайлы ауданындағы мекемелер және халықпен бірге атап өтті. Алты қанат ақбоз үй Маңғыстау жүк тасымалы және Маңғыстау магистральдық желі бөлімшелерінің атынан бой көтерді.
Бұл үй екі күн бойы келген қонақтарды қарық қылды. Наурыздан бір күн бұрын теміржолшылар онда ауызашар беріп, ораза ұстаған жандарға қызмет етсе, мерекеде ауданның Наурыз тойына атсалысып, келген тұрғындарды, сала ардагерлерін қарсы алды. Қос бөлімшенің басшылары Нәжімеден Ғұбашов пен Ерназар Ізтұрғанов та сол жерден табылды. Жиналған жұртты Наурыз мейрамымен құттықтаған олар жылы лебізін білдіріп, әріптестерімен бірге мерекелік іс-шараны атап өтті.
Наурызға арналған тағы бір ағаш үй мерекеге бірер күн қалғанда Маңғыстау белгі беру және байланыс дистанциясының да ауласында тігілген болатын. Онда сала кәсіподағының қолдауымен ұлттық дәстүрді жаңғыртып, мерекелік көңіл көтеретін ойындар өткізілді. Теміржолшылар ұлттық спорт түрлерінен жарысып, ұлттық көріністерді сахналады.
Ұлттық спорт ойындардан, ләңгі тепкен жігіттер қатарында 1,2,3 орындарды телім басшысы Мұхтар Кужекбаев, дәнекерлеуші Жетпісбай Колбаев, радиобайланыс электромеханигі Қалнияз Ізбасов жеңіп алды. Арқан тартуда бірінші орын шеберхана цехының, екінші орын СОБ Маңғыстау цехының, үшінші орын радиобайланыс цехының тобына бұйырды. Гір тасын көтеруде арнайы техника жүргізушісі Талғат Демеген, СОБ электромеханигі Дәулет Жалғасов, Дәнекерлеуші Жетпісбай Колбаевтың алдына ешкім түсе алмай, білекті жігіттер бас жүлделерді алды. Дистанцияның әйел-қыздар қауымы да өздерінің нәзік болғанына қарамай сайысқа келгенде күштің «атасын» танытты. Бірінші орынды радиобайланыс электромеханигі Маржан Иманғалиева, екінші орынды байланыс электромеханигі Гүлшат Кемалова, үшінші орынды инженер Мая Ақназарова еншіледі. Ер азаматтардың да қол күресі қызықты өтті. Бірінші орын арнайы техника жүргізушісі Талғат Демегенге, екінші орын КТСМ электромеханигі Қуаныш Қылышаевқа, үшінші орын электромонтер КИП СЦБ Серікбол Смайловқа бұйырды.
Сайыс жеңімпаздарының барлығы бағалы сыйлық және дипломдармен марапатталды. Дәл осындай наурыз-думан Болашақ, Бейнеу теміржолдарында да өтіп, ұлыстың ұлы күні кең көлемде тойланды.
