«Жолшы кәсібімен мақтан» республикалық семинары өтті
Алматы қаласында «Қазақстан теміржолы» ҰК» АҚ-ның Жолдар мен құрылыстар департаменті директоры Арман Бубикановтың бастамасымен «Жолшы кәсібімен мақтан» атты республикалық семинар өтті.
«Қазақстан темір жолы» ҰК» АҚ «Үздіктер алаңы» корпоративтік дамыту бағдарламасы шеңберінде ұйымдастырылған тәжірибелік семинарға барлық өңірден Магистральдық желі бөлімшелері филиалдарының қызметкерлері мен Жол дистанцияларының бастықтары, болашақ жолшы мамандар қатысты.
Семинарға қатысушыларға теміржолдың абыздары Қалтай Сәмбетұлы, Қуаныш Естемесұлы ақ батасын беріп, өмірлік тәжірибелерімен бөлісті. Ардагер мамандар өз сөздерінде жолшылар – саланың ең маңызды кәсіп иелері екенін атап өтіп, маңызды мәселелерді тілге тиек етті. Саналы ғұмырын шойын жолдың бойында өткізген аға буынның теміржолдың бүгіні мен ертеңіне жанашырлығы сезіліп тұрды.
«Жұмысшы мамандықтар жылында» жолшы кәсібіне көңіл бөлініп жатқаны, әрине, бізді қуантады. Қысы-жазы жол бойында жүретін жолшыларға жүктелетін жауапкершілік қашанда жоғары. Қозғалыс қауіпсіздігін қамтамасыз ету үшін, пойыздардың жылдамдығын арттыру үшін күн-түн демей еңбек етеді. Бұл нақты есепті қажет ететін, қателесуге болмайтын кәсіп.
Қазіргі уақытта салаға енгізіліп жатқан жаңалықтар көп. Ал оны іске асыру, тәжірибеге енгізудің тетіктері қандай? Қатысушылар семинардан не алды? Біз ашық диалог алаңында ой-пікірлерімізбен бөлісіп, SMMART жұмысты жоспарлау критерийлері бойынша жобамызды ұсындық. Туындаған күрделі жағдайдан шығу жолдарын талқыладық.
Жалпы семинардың өндіріске, жеке дамуымызға пайдасы көп болды. Әдістемелік кеңес берілді.
Дәулетбек Несіпбекұлы,
ПЧ-51 Жамбыл жол дистанциясының бастығы