Депутаттар контейнерлік аэрохаб жұмысымен танысты
Маңғыстау облысы бойынша меншікті тілші
Апта басында Ақтауға Парламент Сенатының депутаттары келіп, өңірде жүзеге асырылып жатқан маңызды инфрақұрылымдық жобалармен танысты.
Бүгінгі таңда қарқынды дамып отырған өңірде жүзеге асырылып жатқан жобалар мен маңызды нысандар аз емес. Сенат депутаттары Сүйіндік Алдашов пен Бекбол Орынбасаров облыс әкімінің орынбасары Аббат Өрісбаевпен осы нысандарды аралап көріп, аймақтың даму үдерісіне баға берді.
Облыс әкімдігінің баспасөз қызметі таратқан мәлімет бойынша сапар барысында делегация Арнайы экономикалық аймақ – «Ақтау теңіз порты» аумағында орналасқан контейнерлік аэрохабтың жұмысымен де танысқан. Бұл жоба Президенттің тапсырмасымен басталған болатын. Аталған жобаның мақсаты – Ақтау портын Каспий маңы мемлекеттері мен Орталық Азия елдеріне бағытталған ірі логистикалық орталыққа айналдыру.
Жалпы ауданы 19,2 гектарды құрайтын бұл хабтың өткізу қуаттылығы – бірінші кезеңде жылына 120 мың ДФЭ. Толық іске қосылған соң бұл мүмкіндігі 240 мың ДФЭ-ге дейін жетеді деген болжам бар. Жоба 2024- 2026 жылдар аралығында кезең-кезеңімен жүзеге асырылуы көзделген.