Қазыналы қарттарға құрмет пен тағзым
Түркістан облысы бойынша меншікті тілші
Қарттар күніне орай Шымкент қаласында теміржолда ұзақ жыл еңбек етіп, зейнетке шыққан 60-қа жуық ардагер бас қосып, мерекелік жиында құрмет пен ізетке бөленді.
Ардагерлерге арналған жылы жүздесу Шымкент ЖТ мен Магистральдық желі дирекциясының кәсіподақ ұйымдарының бастамасымен ұйымдастырылды. Шымкент ЖТ бөлімшесінің бастығы Нұрдәулет Тасбалтаұлы ардагерлерді құттықтап, теміржол саласындағы соңғы жаңалықтармен бөлісті. Ол осы күндері жүргізіліп жатқан Дарбаза – Мақтаарал бағытындағы теміржол құрылысы жайлы айтып, нысанның стратегиялық маңызына тоқталып, кезінде НОД-9 аталған бүгінгі бөлімшенің жетістіктерін атап өтті.
Жиын барысында бірқатар зейнеткерлер марапатқа ие болды. Теміржол кәсіподағында 30 жылға жуық қызмет еткен Балтасапар Ибрагимовке Кәсіподақтың 120 жылдығына орай арнайы төсбелгі табысталды. Сондай-ақ бес ардагерге ҚТЖ Орталық ардагер теміржолшылар кеңесінің төрағасы атынан Құрмет грамотасы табыс етілді.
Шара аясында марқұм болған теміржолшылардың рухына Құран бағышталып, тағзым жасалды. Мерекелік басқосу естелік суретке түсіп, ардагерлерге бағалы сыйлықтар үлестірумен аяқталды. Ақ дастархан басында мерекелік концерт тамашалап, көңіл көтерген қариялар алғыстарын жаудырып, риза болып тарасты.
