«Таза Қазақстан»: Арыстық теміржолшылар 120 түп ағаш отырғызды
Түркістан облысы бойынша меншікті тілші
Арыс қаласында теміржол саласының қызметкерлері экологиялық мәдениетті дамыту мен туған өлкені көркейтуге бағытталған маңызды шара өткізді. «Тaзa Қазақстан» республикалық бағдарламасы аясында өткен бұл игі іс Арыс қаласының тұрғындары мен теміржолшыларды біріктіріп, қаланы көгалдандыруға жаңа серпін берді.
Биыл Қазақстан темір жолы өзінің 120 жылдық мерейтойын атап өтуде. Осы атаулы датаға орай өткізілген шарада қатысушылар табиғатты қорғау мен жасыл аймақтарды көбейтуге үлес қосты. Акцияға Арыс қаласының әкімі Қайсар Маңқараев, Шымкент магистральдық желі бөлімшесі директорының орынбасары Жомарт Мырзабеков, өңірдің теміржолшы ардагерлері мен Арыс қаласында орналасқан ондаған теміржол мекемелерінің 150-ге жуық қызметкері қатысты.
Іс-шара барысында қаладағы Дендросаябақ аумағына 120 түп ағаш көшеті отырғызылды. Бұл — ғасырдан астам тарихы бар теміржол саласына деген құрмет пен келешек ұрпаққа жасыл мұра қалдырудың нақты үлгісі.
Қала әкімі Қайсар Маңқараев өз сөзінде табиғатты аялау ісіне белсене қатысқан теміржолшыларға алғысын білдіріп, олардың еңбегін жоғары бағалады:
«Теміржолшылар еліміздің дамуына ғана емес, экологиялық мәдениетті қалыптастыруға да үлкен үлес қосып келеді. Бүгінгі іс – ұлт болашағына жасалған игі қадам», – деді ол.
Айта кетсек, акция Маңғыстау магистральдық желі бөлімшесі ұжымынан экологиялық эстафета ретінде қабылданған «Тaзa Қазақстан» челленджі аясында өтті. Арыс теміржолшылары бұл бастаманы жалғастырып, табиғатты қорғау – әрбір азаматтың борышы екенін баса айтты.
Олар жастарды қоршаған ортаны сақтауға белсенді атсалысуға, туған жердің табиғатын аялауға және «жасыл ел» идеясын ілгерілетуге шақырды.
Арыста өткен бұл экологиялық шара ел азаматтарына үлгі болып, туған жерге деген сүйіспеншілікті нақты іспен дәлелдеді.
