Білікті бас инженерге құрмет

Қызылорда жол дистанциясының ұжымы жылдар бойы теміржол саласында еңбек етіп, бар білімі мен тәжірибесін жас мамандарға үйретіп, оқытудан жалықпаған қадірлі әріптес – бас инженер Ақылбек Әбілдаевты құрметті зейнет демалысына шығарып салды.

Теміржолшылар отбасында туып-өскен оның қатардағы жолшы болып бастаған еңбек жолы жылдар өте биік белестер мен үлкен жауапкершілікке жетеледі. Талай сындарлы жылдардың жүгін көтере жүріп, дистанцияның бас инженері дәрежесіне дейін өсті. Ол туралы әріптестері: «Ол дистанцияның ғана емес, «жолдың бас инженері» десек те болады. Себебі ол әрбір рельс, әрбір шпалдың жағдайын көзін жұмып тұрып айтып беретін білім мен қабілетке ие. Қай телімде күрделі жөндеу, қай учаскеде ағымдық күтім қажет екенін шешетін де сол. Ол дистанцияның нағыз білім мен ақыл көзі болды», – дейді.  

Су жаңа зейнеткердің өзі де толқынысын жасырмады. «Бұл ұжым – менің екінші отбасым. Біз бірге талай қиындықты еңсердік, талай жетістікке жеттік. Темір жол менің өмірімнің мәні болды, ал сендер – сол өмірімдегі ең қымбаттымсыңдар. Бәріңе рақмет!», – деген сөзін ду қол шапалақпен қарс алған ұжымдастар Ақылбек Раушанбекұлына деген шынайы құрмет пен алғыстарын білдірді.  

– Ақылбек Әбілдаев есімі адал еңбектің, жауапкершіліктің, темірдей тәртіптің және адамдықтың символына айналған. Біз оны тек Ақыл деп атаймыз. Сол ат оған жарасатын және атына заты сай болды. Сабырлы, парасатты, кез келген күрделі жағдайдың шешімін ақылмен тауып, ұжымға жол сілтеп отыратын темірқазықтай тұлға болатын. Ақылбек Раушанбекұлын зейнетке шығарып салып, біздің ұжым құнды байлығын жоғалтқандай күй кешері анық. Шынын айтқанда, істің тетігін білетін, бағалы кадрдан ешкімнің айырылғысы келмейді. Сол себепті біз оны зейнетке шығарумен қатар, ардагерлер кеңесінің төрағалығына сайладық. Өйткені оның тәжірибесі мен ақылы әлі де бізге қажет, – деді ұжымның кәсіподақ жетекшісі Ғалия Ноғайбаева.