Тыңнан түрен салған топ

Жуырда «Қазақстан темір жолы» ҰК» АҚ ұйымдастырған «Пойыздар қозғалысы қауіпсіздігі бойынша үздік тәжірибелер» атты үш күндік республикалық байқау өз мәресіне жетті. Қазақстанның барлық өңірінен 12 команда қатысқан байқаудан шымкенттік команда олжалы оралды.

Командалар пойыздар қозғалысы қауіпсіздігін арттыруға арналған инновациялық жобаларын ұсынып, әр өңірдің үздіктері үзеңгі қағыстырған байқауда оңтүстік өлке теміржолшыларынан құралған «Қозғалыс сақшылары» командасы «квиз-ленд» сайысы бойынша ең жедел, білімді және креативті ұжым ретінде танылды. Бұл Шымкент ЖТ бөлімшесі қауіпсіздік қызметі бөлімінің бастығы Төлбасы Ордабай, жол бөлімінің бастығы Сержан Мырзабаев пен Арыс вагон пайдалану депосының бас инженері Ғалым Байзақов, Түркістан станциясының бас инженері Сұлтан Базаров және энергетика шаруашылығы маманы Нұрбақыт Байыров сынды кіл мықтылардан құралған команда еді.  

Айрықша мәртебеге ие болған топ өкілдері өздері қызмет ететін өңір бойынша «Локомотив ресурсын тиімді пайдалану» жобасын ұсынып, Арыс торабында локомотивті айналдыру кезінде туындайтын артық уақыт пен шығын мәселелерін тиімді шешудің тамаша жолын көрсетті. Өйткені бұл станцияда осы күндері локомотивті толық айналдыруға 2-2,5 сағат жұмсалатын көрінеді. Өз кезегінде техниканың бос тұру уақытын өсіріп, бригаданың шығынын арттырады.  

Ал қызметін терең ізденіспен, үздіксіз талдаумен ұштастырған тәжірибелі мамандар өз жобаларында осы түйінді тарқатудың екі бағытын нақтылаған. Оның бірі – ПТОЛ аумағында жаңа жол салу болса, екіншісі – локомотивтің басқару кабинасын жаңарту. Сөйтіп, экономикалық тиімділік тұрғысынан мынадай көрсеткіштер аталады. Ең алдымен доңғалақ жұптарын жөндеу шығыны азаяды. Бұл қаржылық тұрғыда 110 млн теңгені құрайды. Сондай-ақ 420 мың кВт электр энергиясы мен 5 мың тонна дизель отыны үнемделеді. Оған қоса, жұмысшылар бригадасының уақыты 1 мың сағатқа қысқарып, локомотив өнімділігінің артуы 1 мың лок./сағатқа артады. Осындай оңтайлы істердің нәтижесінде станцияның өткізу қабілеті еселеніп, жүк айналымы өседі.  

«Қозғалыс сақшылары» командасы Түркістан станциясы паркіндегі шектік бағаналардан шығу сигналдары жоқ жолдарға жол нөмірін қою туралы да жоба ұсынды. 1-санатты Түркістан станциясы учаскелік деңгейдегі маңызды нысан болғандықтан, мұндағы кіші сұрыптау дөңесінде тәулігіне 1500 вагон өңделеді. Өткен жылы станцияда шығу бағдаршамдарының болмауы салдарынан бағыттағыш бұрманың зақымдану фактісі тіркелген. Оның себеп-салдары ретінде маневрлік локомотив машинисі маршруттың дұрыстығына көз жеткізбеген деген қорытынды шыққан. Осы бір олқылықтың орнын толтыру үшін шектік бағаналарды пайдалану арқылы қатар тұрған жолдардың нөмірін көрсету ұсынылды. Жоба авторларының айтуынша, ГОСТ 8442-65 стандарты бойынша іске асырылған бұл жаңалық маневр машинисі мен маневр жетекшісіне нақты бағытты анықтауға көмектеседі. Нәтижесінде қозғалыс қауіпсіздігі қамтамасыз етіліп, станция қызметінің қарқыны өседі деген сөз.