Студенттерге дәріс оқыды
Түркістан облысы бойынша меншікті тілші
Шымкент магистральдық желі дирекциясына қарасты Арыс жол дистанциясы мен «Арыс қаласындағы №17 колледж» МКҚК арасындағы өзара ынтымақтастық келісімі аясында жуырда маңызды шара ұйымдастырылды.
Басқосу Мемлекет басшысы Қасым-Жомарт Тоқаев жариялаған «Жұмысшы мамандықтар жылына» орай өткізіліп отыр. Ұлттық компания басшылығы 2025–2026 жылдардағы оқу кезеңінде тәжірибелі теміржолшылардың арнайы дәрістер өткізуін ресми түрде оқу бағдарламасына енгізгені белгілі. Осы мақсатта республика бойынша іске асырылуы тиіс арнайы жоспар бекітілген. Соның аясында Арыс ПЧ-54 бас инженері Думан Додабаев №17 колледжге арнайы барып, студенттерге дәріс өткізді.
«Теміржол көліктерін электрлендіру негіздері» тақырыбында ұйымдастырылған шараға ұстаздар мен оқу-әдістемелік бөлім әдіскерлері және студенттер қатысты. Компания өкілі теміржол шаруашылығындағы соңғы жетістіктер мен қолданысқа енгізіліп жатқан жаңа технологиялар және жүзеге асырылып жатқан жобалар туралы баяндама жасады. Сонымен бірге студенттердің сұрақтарына жауап беріп, олардың болашақ мамандыққа деген қызығушылығын арттыра түсті.
Айта кетейік, бүгінде Ғани Мырзахметов басшылық ететін Арыс теміржол колледжінде 826 студент білім алуда. Оның жартысынан көбі теміржол саласына қатысты төрт негізгі бағыт бойынша оқиды. 2 жыл 10 айлық оқу мерзімі бар мамандықтар қатарында: локомотив машинисінің көмекшісі мен жөндеу жөніндегі слесарь; сигнал беру, орталықтандыру және бұғаттау құрылғылары бойынша электромонтер; вагон жөндеу слесарі; байланыс желісінің монтері секілді кәсіптің қыр-сырын меңгеруде. Аталған санат бойынша бүгінде 440 студент мемлекет есебінен тегін білім нәрімен сусындап, арнайы стипендия алады.
Колледж түлектерінің басым бөлігі Арыс қаласында орналасқан теміржол мекемелері мен кәсіпорындарына жұмысқа орналасып, кәсіби теміржолшы ретінде еңбек жолын бастайды.