«Үздік маман-2025»: Арыста теміржолшылар арасындағы кәсіби байқау мәресіне жетті

Арыс қаласында Жұмысшы мамандықтар жылын қорытындылаған «Үздік маман-2025» байқауы Шымкент магистральдық желі бөлімшесіне қарасты теміржол мекемелерінің еңбеккерлері арасында өтті.

Мақсат – теміржол саласындағы жұмысшы мамандықтарының беделін көтеру, еңбек адамын дәріптеу, қызметкерлердің теориялық және практикалық дайындығын жетілдіру.  

Шараға Шымкент магистральдық желі бөлімшесі директорының бірінші орынбасары Жомарт Мырзабеков, «Қазтеміржолкәсіп» ҚБ Шымкент филиалының жетекшісі Нағима Салықбаевадан бөлек, қала әкімі Қайсар Маңқараев қатысып, теміржолшы мамандығы қала тарихында үлкен құрметке ие екендігін атап өтті.  

Жиын Әнұранмен ашылып, қызметтік міндетін атқару барысында қаза тапқан теміржолшыларды еске алу мақсатында бір минуттық үнсіздік жарияланды. Байқау барысында қатысушылар екі кезең бойынша сынға түсті. Алдымен теориялық білімдерін тестілеу арқылы дәлелдесе, кейін практикалық тапсырмалар орындап, кәсіби шеберліктерін көрсетті. Сарапшылар алқасы нәтижелерді әділ бағалап, үздіктерді анықтады.  

Байқау қорытындысында арнайы номинациялар бойынша жеңімпаздар анықталды: «Үздік жол жөндеуші» – Шымкент жол дистанциясының жол жөндеушісі Есберген Бақдәулет; «Үздік байланысшы» – Арыс белгі беру және байланыс дистанциясының электромеханигі Владимир Салтанов; «Үздік энергетик» – Түлкібас станциясының түйіспелі желі электромонтері Бақытжан Құрманалиев; ССПС машинистері арасында «Үздік машинист» – Шымкент электрмен жабдықтау дистанциясының машинисі Мұқағали Тастанбек; Қалпына келтіру пойызы бойынша «Үздік маман» – Шымкент қалпына келтіру пойызының кран машинисі Владимир Шарапов; «Үздік өрт сөндіруші» – Түркістан өрт сөндіру пойызының өрт сөндірушісі Ердәулет Төлбасиев; «Үздік вокзал қызметкері» – Арыс теміржол вокзалы бастығының кезекші көмекшісі Айткүл Сейсенбаева; «Үздік жол шебері» – Арыс жол дистанциясының жол шебері әрі жол бригадирі Оразбек Мырзахметов; «Үздік дәнекерлеуші» – Арыс қалпына келтіру пойызының дәнекерлеушісі Мейіржан Есіркепов және Шымкент жол дистанциясының өткел кезекшісі Руслан Абдешов «Үздік өткел кезекшісі» деп танылды. Өз кәсібі бойынша топ жарған жеңімпаздарға арнайы сыйлықтар мен қаржылай сертификаттар табысталды.  

Сондай-ақ іс-шара аясында Шымкент бөлімшесінде әр тоқсан сайын өткізілетін балдық көрсеткішпен 2025 жылдың 3 тоқсан жұмысы қорытындыланып, жеңімпаздар анықталды. Бұл бағыт бойынша Шымкент жол дистанциясы мен Шымкент белгі беру және байланыс дистанциясының 2-ші телім учаскелері (СОБ құрылғылары) және Электрмен жабдықтау дистанциясының №241 Арыс түйіспелі желі ауданының жұмыстары жоғары бағаланды. Ал жыл қорытындысы бойынша үздік мекеме номинациясына Арыс жол дистанциясы лайық деп танылды. Сонымен қатар теміржол саласының дамуына елеулі үлес қосқан бірқатар еңбек озаттарына Арыс қаласы әкімі атынан Алғыс хаттар табысталды.