Асығы алшысынан түсті...

Семейлік теміржолшылар Наурызнама онкүндігі аясындағы іс-шараларды ұлттық ойындармен қорытындылап, асық атудан шеберлік сынасты.

Жалпы, асық ойыны Семей теміржолы бойынша ең жиі өткізілетін ұлттық спорт түріне жатады. Өткен жылы салалық кәсіподақ ұйымының ұйытқы болуымен бөлімше біріншілігі ұйымдастырылып, ұлан-асыр жарыс өткен болатын.  

Ал бұл жолғы асық ойынының бәсі бөлектеу болды. Оған тек теміржолшылар ғана емес, вокзалға келген кез келген қала тұрғыны қатысуға мүмкіндік алды.  

Сайысты ұйымдастырушы бөлімшедегі «Локомотив» спорт клубының нұсқаушылары ойын ережесін қысқаша түсіндіріп шықты.  

Айта кетерлігі, сайысқа қатысқандар арасында қолына асықты алғаш ұстағандар да болды. Әсіресе қалалық қыз-келіншектер алғашқыда біршама жүрексінгенімен, кейіннен жанкүйерлердің дем беруімен ойын қызығына еніп кетті. Десек те, сақаны шиіріп ұстап, тізілген асықтарды шеңберден шебер асырған сұр мергендер де табылды. Атап айтсақ, кәсіподақ ұйымының есепшісі Сәуле Асқарова, «Түрксіб-Семей» мұражайының қызметкері Әсем Досанова шебер ойындарымен тәнті етті.  

Ал ерлер арасынан Теміржол колледжінің студенттері ерекше белсенділік танытып, жүзден жүйрік атанды.  

– Асық ойыны соңғы уақытта теміржолшылар арасында кеңінен тарап, дамып келеді. Бұрын тек наурыз мерекесінде ғана ойнасақ, қазіргі уақытта жылдың кез келген мезгілінде сайыс өткізіп жүрміз. Жалпы, «Дүниежүзілік көшпенділер ойындары» бағдарламасына асық спорты да кіретінін ескерсек, бұл ұлттық спорттың елімізде болашағы зор. Ал Аманжол Аусыдықов сынды үздіктеріміз асық ойынынан спорт шеберіне үміткер атануға күш салуда, – дейді салалық кәсіподақ белсендісі Серік Дүйсенбаев.  

Бұл жолғы сайыс мерекелік, ойын-сауықтық сипатта болғандықтан да арнайы орындар берілген жоқ. Тек мергендігімен танылғандардың барлығы кәсіподақ ұйымы тарапынан әзірленген сыйлықтармен марапатталды. Ал асық атудан бөлімше біріншілігі дәл өткен жылдағыдай биыл да жазда өткізілетін болады.