Сәні мен салтанаты жарасқан

Биылғы Наурыз мерекесі барлық теміржол мекемелерінде жоғары деңгейде ұйымдастырылып, ұлттық рух пен дәстүрдің жарқын көрінісіне айналды.

Әсіресе Қандыағаш жол дистанциясы, Қандыағаш локомотив депосы, Никельтау жол дистанциясы мен Дөң станциясында өткен іс-шаралар ерекше атмосферасымен есте қалды. Ұлттық киім киген теміржолшылар мерекенің сәнін кіргізді.  

Алға вокзалында жолаушылар мен жолсеріктерге перронда бауырсақ таратылып, көпшілікке мерекелік көңіл күй сыйлады. Ал Шалқар станциясында үлкен қазан асылып, наурыз көже пісірілді. 

Киіз үй тігіліп, ақ дастархан жайылып, ұлттық ойындар ұйымдастырылды. Бұл шаралар теміржолшылармен қатар жолаушыларға да ерекше әсер қалдырды. Қандыағаш жол дистанциясының ақ дастарханы басында ізгі тілектер айтылып, үлкендер батасын берді. Ұлттық дәстүрлер дәріптеліп, қазақ халқының қонақжайлығы мен кеңпейілділігі кеңінен насихатталды.  

Мереке күндері теміржолшылар қазақтың ұлттық киімдерінің сан алуан үлгісін паш етті. Сәні мен салтанаты жарасқан шапан, бешпент пен қамзолдар көздің жауын алып, әрбір қызметкер өз даралығын көрсетіп, ел бірлігі мен мәдени әралуандығын таныта білді.  

«Қазақтың киімі қарапайым әрі ыңғайлы, бірақ сонымен бірге өзінің мәнін, иесінің мәртебесін білдіреді. Ұлттық киім күні әркімге өз даралығын көрсетуге, еліміздің бірлігі мен мәдени байлығын таны- туға мүмкіндік береді. Сондықтан біздің теміржолшылар бұл дәстүрге әрдайым құрметпен қарайды», – деді Ақтөбе магистральдық желі бөлімшесі кәсіподақ ұйымының төрағасы Айша Қалағанова.  

Мерекелік бағдарлама аясында ұлттық ойындарға да ерекше мән берілді. Арқан тарту, қол күрес, гир көтеру, қой көтеру сияқты сайыстар ұйымдастырылып, жығылған балуанға да бәйге берілген күн болды.