Алты жасар Ақнұрдың жетістігі
"Қазақстан теміржолшысы" газетінің Жамбыл облысындағы меншікті тілшісі
«ҚТЖ» ҰК» АҚ басқарма төрағасы Талғат Алдыбергенов ментальді арифметикадан Өзбекстанның Бұхара және Алматы қалаларында өткен халықаралық білім бәсекесінен жүлдемен оралған алты жасар тараздық Ақнұр Бақыттың ата-анасына Алғыс хат жолдады.
Ақнұрдың анасы Зейнеп Дәулетова Тараз қаласындағы Бурыл станциясында жүк қабылдаушы болып еңбек етеді. «ҚТЖ – Жүк тасымалы» ЖШС «Жамбыл» филиалының бас инженері Дүйсенбек Сыдықов зейіні мен зеректігінің арқасында жеңіске жеткен Ақнұр мен анасын қабылдап, компанияның басқарма төрағасының Алғыс хатын тапсырды. Бейсеуовтер отбасын жетістіктерімен құттықтап, филиал атынан велосипед тарту етті.
– Біз талантты балаларымызды әрқашан қолдаймыз. Ақнұрдың халықаралық жарыстан жеңіспен оралуы – үлкен жетістік. Компания басшылығы теміржолшылар отбасын қолдауға, сала мамандарын ынталандыруға баса мән береді. 1 маусым – Халықаралық балаларды қорғау күні қарсаңында талантты, талапты жеткіншектерімізді марапаттап, балғындарымызға мерекелік көңіл күй сыйлау дәстүрге айналған, – деді Дүйсенбек Сыдықов.
Ақнұр Бақыт шаһардағы «Келешек мектептері» жобасы аясында ашылған №66 мектептің даярлық сыныбын аяқтады. Анасы Ақнұрды 5 ай бұрын ментальді арифметика үйірмесіне бергенін айтады.
– Күйеуім басқа саланың маманы, екеуіміз 4 баланы тәрбиелеп отырмыз. Тұңғышым 9-сыныпты бітірді. Ақнұр күзде 1-сыныпқа барады. Екеуі әлі мектеп жасына жеткен жоқ. Ақнұрдың ментальді арифметиканы меңгере бастағанына жарты жылға жуықтады. Екі бірдей халықаралық жарысқа қатысты. Өзбекстаннан 2-орын, Алматы қаласынан 1-орынды жеңіп алды. Алда тағы бір білім бәсекесі күтіп тұр, – дейді анасы.
Зейнеп Дәулетова 12 жылдан бері Бурыл станциясында жүк қабылдаушы болып еңбек етіп келеді. Жұмыста – жауапты маман, отбасында – бала тәрбиесін алдыңғы орынға қоятын ана.