Тараздық түлектер теміржол саласындағы бос жұмыс орындарымен танысты
"Қазақстан теміржолшысы" газетінің Жамбыл облысындағы меншікті тілшісі
Тараз темір жол көлік және коммуникация колледжінің түлектері үшін «Теміржол – тұрақты болашақтың кепілі» тақырыбында кездесу ұйымдастырылды.
Ашық диалог форматында өткен іс-шарада «Жамбыл магистральдық желі бөлімшесі» филиалының персоналдарды басқару бөлімінің бастығы Индира Қоңқашева болашақ мамандарға темір жол саласының құрылымдық бөлімшелеріне жұмысқа орналасу тәртібі мен талаптары туралы түсіндіріп өтті.
- Темір жол – тұрақтылықтың кепілі. Кәсіби білімі бар жастарға жұмысқа орналасуға мүмкіндік көп. Себебі, қазір «Қазақстан темір жолы» ҰК» АҚ-ның барлық филиалдарында жұмысқа орналасу процесі ашық жүреді. Ол үшін кәсіби білімі бар маман алдымен, ресми портал - job.railways.kz арқылы өз түйіндемесін жіберуі керек. Қандай бос жұмыс орындары бар екенін де осы сайттан электронды түрде бақылап, көре алады, - дей келе Индира Шаяхметқызы теміржол саласына жұмысқа орналасудың ашық жүйесінің артықшылықтарын атап өтті.
Сондай-ақ, «Жамбыл магистральдық желі бөлімшесіне» қарасты еңбек ұжымдарында қандай мамандар қажет екенін айтып, еңбек нарығындағы сұранысқа талдау жасады. Түлектерді тұрақты табыстың кепілі болатын теміржол саласында жұмыс істеуге шақырды.