Семей теміржолында ауыз су мәселесі толық шешілді

«Мөлдір бұлақ» бағдарламасы бойынша теміржол бойындағы елді мекендер мен шаруашылықтарды сапалы ауыз сумен жабдықтауда ел шығысында қазіргі күнге дейін атқарылған жұмыстар аса ауқымды.

Желі бойындағы көптеген жол айрықтарындағы су беру нысандары күрделі жөндеуден өткізілсе, тағы бірқатар станцияларға су тұшытатын құрылғылар орнатылды. Жекелеген нысандарға құрылыс-монтаждау жұмыстары жүргізіліп, пилоттық жобалар сәтімен іске асырылды. Бірқатар станцияларда ауыз су модульдері орнатылып, енді бірі аудандық орталықтандырылған су жүйесіне қосылды.

Осындай еселі еңбектің нәтижесінде бүгінгі Семей теміржолы бойынша ауыз су төңірегінде өзекті проблема жоқ. Қазіргі негізгі қызмет – ауыз су сапасын назарда ұстап, сараптама жұмыстарын уақытында жүргізу.  

Бүгінде «Теміржолсу-Аягөз» ЖШС бүкіл Семей өңіріне қызмет көрсетеді. Бауыржан Үмбетов басқаратын ұжым соңғы жылдары ауқымды жұмыс атқарды. Соның ішінде «Теміржолсу-Аягөз» мекемесінің Сырым Сағымбаев басқаратын Семей учаскесі бойынша да қыруар жұмыс жасалып, нәтижесінде «батыс» және «солтүстік» тармақ бойынша су тасымалы толығымен жойылды. Қазіргі күні семейлік сушылар нысандарды алдағы қысқа даярлау үстінде. Жұмыс жүйелі, қызмет тиянақты.  

«Су жеткізу – сауапты іс» дейді атам қазақ. Осы сауапты жұмыспен айналысып, талай жылдан бері маманданған сушылар ұжымы осыдан жиырма жыл бұрын бастау алған бағдарламаның алғы шебінде жүргендердің еңбегін ұмытпайды. Әсіресе «Теміржолсу» АҚ президенті болған марқұм Қуат Есімхановтың, «Теміржолсу-Павлодар» ЖШС директоры болған Махамеджан Ушурбакиевтің ерлікке пара-пар еңбектерін айтпай кетуге болмайды. Бұл азаматтар басшылық еткен жылдары Семей учаскесінде аңызға бергісіз атышулы жұмыстар жүзеге асырылды. Сол жылдары өндіріс шебері болған Бейбіт Баймолдаев, Сәбит Хамзин, Өміртай Рахмадиев, Қайрат Шаукенов сынды еңбектің қара нары атанған азаматтар барлық жұмыстың басы-қасында жүрді. Олармен үзеңгілес жүріп, қызмет атқарған бүгінгі басшы Сырым Сағымбаев ардагер ағаларымен әлі күнге дейін хабар алысып тұрады. Олардың қатарында бүкіл өмірін теміржол бойын суландыруға арнаған слесарь Серік Жұханов, сумен қамту шебері Қанат Дауылбаев, сушы Гүлнара Рихтер, жүргізушілер Федор Харитонов, Қанат Муслимханов, Марат Құрманғалиев сынды ардагерлерді де алғыспен атап өткенді жөн көреді.  

Бір ғана мысал, олар станцияларға орнатылатын су тұщыту модульдерін Семейдің өз басында құрастыруды алғаш жолға қойған еді. Осылайша, заманауи модульдерді сатып алу мен тасымалға жұмсалатын шығындар күрт азайған болатын. Қазіргі таңдағы атқарылып жатқан шараларға да осынау аға буынның қосар ақыл-кеңесі аз емес. Сумен жабдықтау сынды сауапты істің шебері болудың жауапкершілігі осындай. Ал мекеменің бүгінгі мамандары алдыңғы толқын ағалардың даңқты жолын абыроймен жалғастырып келе жатыр.