Ұсыныс: Қосымша вагондар қажет
Алдымызда жаңа жыл жақындаған сайын ұшақ пен пойыздарға жолаушылар билеті де сұранысқа ие бола бастайтыны белгілі. Қазірдің өзінде Астана, Алматы сынды орталық қалалардан аймақтарға билет жоқ. Бірақ Атырау темір жол вокзалының билет кассаларынан «вагондар қосылады» деген жағымды хабарды да естиміз.
Жалпы, «Жолаушылар тасымалы» АҚ Атырау телімі бастығы Ә.Есқалиевтің айтуынша, телімнің пайдаланатын паркі 136 вагонды құрайды. Телімінің өзінің құрылымында 4 жолаушылар пойызы бар, соның ішінде№41/42 «Атырау–Алматы-1» бағытындағы пойызы 3 құрамнан тұрады, бір құрамда 6 купелік, 8 плацкартты вагон бар. Сондай-ақ, Алматы-Атырау арасына Тальго пойызы жүреді. №47/48 «Атырау-Астана-Нұрлыжол» бағытындағы пойыз 2 құрамнан тұрады, бір құрамда 3 плацкартты, 6 купелік вагон бар. Енді оны 20 вагонға дейін ұлғайтуға жұмыс жасауда екен. Атырау-Маңғыстау, Атырау-Ақтөбе пойыздарына да билет қат болып қалады.
Атырау аймағы бойынша 9 бекетте «Жолаушылар тасымалы» АҚ-ның 12 билет кассасы жұмыс жасайды, соның ішінде Атырау вокзалында 4 касса (3 касса тәулік бойы қызмет көрсетеді) бар. Сонымен қатар, 10 агенттік билет кассасы орналасқан. Олардың бағасы 300-400 теңгеге қымбаттау. Атырау вокзалында «ЖТ» АҚ-ның билет кассасы сатылымның тәуліктік орта есеп көрсеткіші бойынша 1580 билетті құрайды. Сонан кейінгі орында Құлсары – 146-150 билет, Мақат – 102-105 билет, ал басқа станцияларда тәулігіне 30-дан 70-ке дейін билет сатылады. Аймақтағы барлық билеттік кассалары БККФ (кассалық кешендермен фискализацияланған) билеттермен жабдықталған, билет кассаларында электронды жол жүру құжаты да сатылады.
Атырау телімінің өзінің құрылымындағы жолаушылар пойызының айлық көрсеткішіне келсек, «Атырау-Маңғыстау» – 28804 орын, 72%-і сатылған – 20798 орын. «Атырау-Астрахань» – 4176 орын, 81%-і сатылған – 3401 орын. «Атырау-Астана-Нұрлыжол» – 12132 орын, 74%-і сатылған – 9025 орын. «Атырау-Алматы-1» – 11990 орын, 92%-і сатылған – 11037 орын. Қорытынды ұсынылғаны – 57102 орын, сатылғаны 78%-і – 44261. Дегенмен, қазіргі уақытта билетке сұраныс күшті, сондықтан барлық бағытта да вагондар қосу қажеттігі айқын сезіледі.
Қосұйым Мұқашев, Атырау
Суретті түсірген автор